Mesfushori i Barcelonës, Marc Casadó, vazhdon të lidhet me një largim të mundshëm nga klubi përpara mbylljes së afatit kalimtar të janarit, i cili ka hyrë në javën e tij të fundit.
22-vjeçari ka pasur pak hapësira këtë sezon, pas një fushate shpërthyese vitin e kaluar.
Casadó ka luajtur vetëm 871 minuta këtë sezon në 19 paraqitje dhe, pavarësisht se Pedri u largua i dëmtuar pas një ore lojë, ai e kaloi të gjithë fitoren e Barcelonës ndaj Slavia Prague në stol.
Para tij u aktivizua Marc Bernal, dhe duket se adoleshenti e ka kaluar Casadón në hierarkinë e trajnerit. Javët e fundit kanë sjellë pretendime se Casadó tani është i gatshëm të konsiderojë një largim, diçka që nuk e pranonte gjatë merkatos së verës.
Skuadra e fundit që është lidhur me Casadón janë gjigantët turq të Galatasarayt, të cilët po kërkojnë të bëjnë lëvizje përpara përfundimit të afatit kalimtar.
"Sport" i referohet disa raportimeve nga Turqia që sugjerojnë se Casadó është një nga opsionet në listën e tyre.
Mesfushori ka kontratë deri në vitin 2028 dhe një klauzolë lirimi prej 100 milionë eurosh, por thuhej se Barcelona do të kishte hapur derën për një ofertë rreth 30 milionë eurosh gjatë verës.
Kjo vjen pas interesimit nga Atletico Madridi dhe Manchester United. Los Rojiblancos po kërkojnë një përforcim në mesfushë për të zëvendësuar Conor Gallagher, dhe Casadó është një nga emrat në listën e tyre, por duket se ata po i japin përparësi një lëvizjeje për João Gomes ose Ederson.
Nga ana tjetër, Manchester United ka zhvilluar gjithashtu takime me agjentin e tij gjatë javës së fundit. Nëse ndonjëra prej këtyre skuadrave do ta konkretizojë interesimin me një ofertë zyrtare, mbetet për t’u parë, por Casadó duket qartë se nuk është aktualisht pjesë e planeve të Hansi Flick./GazetaExpress/
