Trajneri i Romës, Gian Piero Gasperini, u shfaq shumë i irrituar pas humbjes ndaj Como, duke drejtuar kritikat ndaj vendimit për të përjashtuar Wesley França me kartonin e dytë të verdhë dhe duke u ankuar për atë që e quajti një problem në rritje me simulimet në futbollin modern.
Trajneri i Romës nuk u përmbajt në deklaratën e tij për “DAZN”.
“E kam parë tashmë incidentin me Wesley. Sot është e kotë të komentosh këtë prirje në futboll, sidomos sa i përket simulimeve,” tha ai.
Sipas tij, ai moment ndikoi drejtpërdrejt në rezultatin e ndeshjes.
“Ishte një episod vendimtar, ashtu si edhe ai i golit të barazimit të tyre. Ne i mbrojtëm mirë pasimet prapa, por në atë moment nuk ishim mjaftueshëm të mirë. Një pjesë e fajit është e jona dhe nuk po kalojmë një moment të mirë, por këto janë episode shumë të dukshme që është e vështirë të injorohen”, shtoi ai.
Sa i përket analizës taktike, Gasperini pranoi se Roma kishte mundësi ta kthente ndeshjen në pjesën e dytë.
Megjithatë, ndryshimet që bëri Como në pushim, së bashku me përjashtimin e Wesleyt, ndryshuan rrjedhën e takimit.
Me ndeshjen e kthimit në Ligën e Evropës kundër Bolognës që po afrohet, ai theksoi se skuadra duhet të reagojë shpejt.
“Lojtarët janë të rinj dhe disa kanë përvojë, por duhet të rikuperojnë energjinë shpejt. Pezullimet na prishin vazhdimësinë, por ndeshja e së enjtes është shumë e rëndësishme dhe duhet të jemi gati”, e mbylli ai./GazetaExpres/
