Gian Piero Gasperini ka lënë një mesazh lamtumire për tifozët e Atalantës në edicionin e së shtunës të gazetës *l’Eco di Bergamo*, ku thekson se do të kishte dashur të arrinte edhe më shumë gjatë nëntë viteve të tij si trajner i skuadrës, por është i bindur se “La Dea” do të festojë sërish së shpejti.

Gasperini ka vendosur të largohet nga Atalanta pas një periudhe nëntëvjeçare në krye të ekipit dhe pritet të zëvendësojë Claudio Ranierin si trajner i Romës në fillim të sezonit 2025-26. Sipas disa mediave, 63-vjeçari do të firmosë një kontratë trevjeçare me klubin nga kryeqyteti, që do të zgjasë deri në verën e vitit 2028.

Fabrizio Romano shton se marrëveshja do të përfshijë bonuse në rast të kualifikimit në Ligën e Kampionëve apo fitimit të titullit në Serie A.

“Nuk ishte e mundur ta shprehja këtë më herët, vetëm në orët e fundit kam vendosur realisht t’i jap fund këtij rrugëtimi të mrekullueshëm që zgjati nëntë vjet. Por mos të themi lamtumirë, nuk më pëlqen kjo fjalë. Po e mbyll përvojën time si trajner i Atalantës, gjithçka tjetër do të mbetet e pandryshuar,” tha Gasperini në mesazhin e tij përmes “l’Eco di Bergamo”.

“Largimi nga klubi ishte vendim i imi, dhe nuk duhet vënë asnjë përgjegjësi mbi klubin apo drejtuesit. Thjesht kam kuptuar që ka ardhur momenti për të ndërmarrë këtë hap.”

Ai shpjegoi gjithashtu se dëshironte ta linte Atalantën në një gjendje më të mirë sesa kur kishte ardhur.

“Gjatë gjithë sezonit që sapo përfundoi, kam menduar vetëm të largohem në pikën më të lartë të mundshme. Dhe po i lë në vend të tretë në renditje, të kualifikuar për Ligën e Kampionëve, ku do të mund të luajnë sërish në stadiumet më prestigjioze të Evropës.”

“Arritëm rezultate vërtet të jashtëzakonshme. Do të kisha dashur të bënim edhe më shumë, nuk ia dolëm, por festuam shumë bashkë dhe jam i sigurt se do ta bëni sërish.”

Në fund, Gasperini sqaroi edhe arsyen e vërtetë pse ka vendosur të largohet nga Atalanta për t’u bashkuar me Romën.

“Për nevojën e motivimeve të reja, për besimin që më është treguar dhe për entuziazmin e rinovuar që kjo më sjell.”

“Po flasim për një sfidë të madhe, emocionuese, që më mbush me adrenalinë. Do të shihemi sërish në Piazza Pontida, premtoj! Adòss!”