Gian Piero Gasperini beson se është plotësisht e drejtë që tifozët e Romës të fillojnë të ëndërrojnë për Scudetton, pasi ekipi i tij shkon në pushimin ndërkombëtar në krye të tabelës së Serie A falë fitores 2-0 ndaj Udineses të dielën.
“Giallorossët” kishin pak mundësi për rotacion pas fitores 2-0 në Europa League kundër Glasgow Rangers të enjten, por nuk u vu re lodhje, me Lorenzo Pellegrinin që shënoi nga penalltia dhe Zeki Celik që vulosi rezultatin 2-0 ndaj Udineses.
Artem Dovbyk u detyrua të largohej nga fusha për shkak të një problemi në ije pak para përfundimit të pjesës së parë, duke iu bashkuar listës së mungesave që përfshin Paulo Dybalan, Evan Fergusonin, Leon Baileyn dhe Angelinon, duke lënë Romën pa asnjë qendërsulmues të shëndetshëm.
Fitorja e së dielës e vendos Romën e vetme në krye të tabelës para pushimit për kombëtaret, edhe pse mund të kapet nga Interi nëse skuadra e Cristian Chivus arrin të mposhtë Lazion në “San Siro” mbrëmjen e sotme.
“Është fantastike që tifozët po ëndërrojnë për Scudetton,” tha Gasperini për “DAZN” pas ndeshjes.
“Shkuam në pushimin ndërkombëtar si kryesues, dhe kjo është një burim i madh krenarie dhe kënaqësie për tifozët. Përqindjet dhe probabilitetet do t’i shohim më vonë”, tha ai.
Duke folur për fitoren ndaj Udineses, Gasperini shtoi: “Ata luajtën shumë mirë kundër një kundërshtari të vështirë. Luajtëm me vendosmëri dhe mbajtëm ritmin shumë të lartë. Ata u përpoqën të luanin me topa të gjatë, por ngadalë ne filluam të dominojmë lojën. Në minutat e fundit pati pak lodhje, por jam shumë i kënaqur duke marrë parasysh nivelin e vështirësisë së ndeshjes”.
Ish-kapiteni Lorenzo Pellegrini shënoi nga penalltia ndaj Udineses dhe ka qenë një nga përfituesit kryesorë që nga dëmtimi i Paulo Dybalas.
“Është një lojtar i mirë, është i shëndetshëm dhe i pjekur,” tha Gasperini.
“Nga ana futbollistike, është shumë i fortë. Duhej t’i rikthenim besimin që meritonte. Tani është në formë të mirë fizike dhe ne jemi të lumtur për të — por edhe për veten tonë, sepse përfitojmë prej tij”, shtoi ai.
Sa i përket çështjes së penalltive, Gasperini shtoi me humor: “Kush shënon, i merr ato. Shënimi i penalltive nuk është diçka e zakonshme për ne. Pellegrini i godet shumë mirë, por edhe Dybala kishte një rekord të mirë para ndeshjes me Milanin”.
Lidhur me gjendjen e Dovbykut, trajneri tha: “Do ta shohim nesër. Nuk duket mirë. Fatmirësisht kemi pushimin para ndeshjes së ardhshme, por këto janë dëmtime që të mbajnë jashtë dy deri në tre javë — ndoshta edhe pesë a gjashtë ndeshje. Kemi shumë mungesa në të njëjtin repart, por deri tani kemi arritur t’i përballojmë mirë. Shpresojmë të rikuperojmë sa më shumë lojtarë gjatë pushimit”, përfundoi Gasperini./GazetaExpress/
