Barcelona këtë sezon po përballen me një fatkeqësi të vazhdueshme sa i përket dëmtimeve, dhe tani lajmet janë edhe më të rënda: Gavi pritet të mungojë për një pjesë të madhe të sezonit 2025-26.

Ditët e fundit, Barcelona konfirmoi se mesfushori do t’i nënshtrohet një operacioni për të trajtuar shqetësimet në meniskun medial – të njëjtin gju ku ai pësoi këputjen e ligamentit të kryqëzuar (ACL) në nëntor të vitit 2023. Pas javësh me dhimbje dhe problematika, u vendos që ndërhyrja kirurgjikale ishte zgjidhja më e mirë për të shmangur komplikime në të ardhmen.

Fillimisht, shpresa ishte që Gavi të rikthehej për 5-6 javë, por realiteti është krejt tjetër. Klubi katalanas njoftoi zyrtarisht në X se periudha e rikuperimit do të zgjasë rreth 4-5 muaj:

“Lojtari i ekipit të parë, Pablo Páez Gavira ‘Gavi’, ka kryer një artroskopi për të zgjidhur një dëmtim të meniskut medial, i cili është qepur për të ruajtur meniskun. Koha e rikuperimit llogaritet rreth 4-5 muaj.”

Nëse afatet respektohen, mesfushori do të rikthehej në fushë më herët në shkurt, por për shkak të ndjeshmërisë së dëmtimit, Barcelona ka gjasa të tregojë kujdes maksimal, duke shtyrë rikthimin deri në mars.

22 muajt e fundit kanë qenë jashtëzakonisht të vështirë për Gavi, i cili tashmë përballet me një tjetër mungesë të gjatë. Për Barcelonën, kjo është një humbje e madhe, pasi ai ishte një element kyç në planet e Hansi Flick, duke e lënë mesfushën me një boshllëk të ndjeshëm.

Sa i përket zëvendësimit, Marc Bernal tashmë është kthyer në fushë pas dëmtimit të tij të ACL-së, ndërsa opsione të tjera vijnë nga La Masia, ku disa talente mund të promovohen për të mbuluar mungesën e Gavinit në skuadrën e parë./GazetaExpress/