Botuesi i gazetës holandeze De Telegraaf dhe i gazetës Irish Independent ka pezulluar një nga gazetarët e saj të lartë pasi ai pranoi se kishte përdorur inteligjencën artificiale për të “vënë gabimisht fjalë në gojën e njerëzve”, shkruan The Guardian, trasnmeton Express.

Gazetari, Peter Vandermeersch, e ka pranuar se ka rënë në kurthin e gabimeve të gjeneruara nga AI.

Gazetari me përvojë tha se kishte përmbledhur raportet duke përdorur mjete të inteligjencës artificiale si ChatGPT , Perplexity dhe NotebookLM të Google, dhe nuk kishte kontrolluar nëse citimet nga ato përmbledhje ishin të sakta. Më pas ai i botoi ato në buletinin e tij Substack.

Gabimet u nxorën në pah nga një hetim i kryer nga një prej titujve të medias së Mediahuis , NRC, ku Vandermeersch kishte qenë kryeredaktor në vitet 2010. NRC pretendoi se Vandermeersch kishte botuar “dhjetëra” citate që ishin të rreme dhe se shtatë individë të cituar në postimet e tij thanë se nuk kishin bërë deklaratat që u atribuoheshin atyre.

“Gabimisht ua vura fjalën njerëzve, kur duhej t’i kisha paraqitur si parafraza. Në disa raste, kjo pasqyronte interpretimin tim të fjalëve të tyre. Kjo nuk ishte thjesht e pakujdesshme – ishte e gabuar”, shkroi Vandermeersch në një postim në Substack me titull “Po e pranoj gabimin tim”.

Vandermeersch shtoi: “Është veçanërisht e dhimbshme që bëra pikërisht gabimin për të cilin i kam paralajmëruar vazhdimisht kolegët: këto modele gjuhësore janë aq të mira sa prodhojnë citate të papërmbajtshme që tundohesh t’i përdorësh si autor. Sigurisht, duhet t’i kisha verifikuar. ‘Mbikëqyrja njerëzore’ e nevojshme, të cilën e mbështes vazhdimisht, dështoi.”