Kampionët e Premier League kanë ndjekur Alexander Isak deri tek Real Sociedad dhe tani po përpiqen ta sjellin në Anfield.

Një gazetar i respektuar me lidhje të ngushta me Newcastle United ka dhënë një përditësim të madh sa i përket ndjekjes që Liverpool po i bën sulmuesit suedez, Alexander Isak.

Liverpooli ka shpenzuar rëndë në këtë afat kalimtar veror për të përforcuar skuadrën në prag të mbrojtjes së titullit në Premier League.

Florian Wirtz, Jeremie Frimpong, Hugo Ekitike dhe Milos Kerkez janë blerjet më të bujshme deri tani për “The Reds”, ndërsa shtimi i Isak do të ishte një sinjal i qartë ambicieje – për të mos përmendur faktin që do t’i shtonte skuadrës një sulmues të frikshëm në repartin tashmë vdekjeprurës të Arne Slot.

Sulmuesi i Newcastle e ka bërë të qartë qëllimin e tij, duke u shpallur i padisponueshëm për turneun parapërgatitor të “Magpies” në Azi për të “shqyrtuar mundësi të tjera” me synimin për t’u larguar nga Tyneside.

Të enjten, u raportua se sulmuesi i Suedisë po stërvitet i vetëm te ish-klubi i tij, Real Sociedad.

Gazetari Keith Downie raportoi të mërkurën se 25-vjeçari nuk ishte paraqitur fare në qendrën stërvitore të Newcastle dhe sqaroi situatën rreth mundësisë së transferimit të Isak te Liverpooli.

“Jam plotësisht i bindur se nëse Liverpooli vjen me një ofertë të madhe në tryezë, marrëveshja do të realizohet,” ka thënë Downie në një video në YouTube.

“Është vetëm çështje nëse Liverpooli do të mund t’i mbledhë fondet apo jo. E di që Newcastle ka vendosur një çmim prej 150 milionë paund dhe këtë e kërkojnë.”

“Mendoj se marrëveshja do të bëhet për rreth 135 milionë paund, diçka e tillë, që sërish do të thyejë rekordin në Premier League.”

Edhe sipas standardeve të investimeve që Liverpooli ka bërë këtë verë, 135 milionë paund do të ishte një shumë tejet e lartë për një rival në kampionat.

Por Isak është një lojtar i dëshmuar, me përvojë në Premier League. Ka shënuar 54 gola në 86 paraqitje që prej se iu bashkua Newcastle United në vitin 2022, ndërsa sezoni i jashtëzakonshëm 2024-25 e riktheu skuadrën e Eddie Howe në Ligën e Kampionëve – dhe për më tepër, me trofeun e parë të madh pas 70 vitesh.

Megjithatë, as një tjetër garë në elitën e Evropës nuk ishte e mjaftueshme për ta mbajtur Isak larg interesimit të klubeve të tjera. Sipas fjalëve të Downie, “atij tashmë i është kthyer mendja.”

Isak e ka vërtetuar veten si një nga goleadorët elitë të futbollit evropian, madje sezonin e kaluar kishte mesatare shënimi më të mirë se Mohamed Salah në formën e tij më të mirë.

Nëse Liverpooli e arrin marrëveshjen për ta sjellë në Anfield, do të jetë shumë e vështirë që dikush t’i ndalë sezonin e ardhshëm. /GazetaExpress/