Steven Gerrard ka bërë një deklaratë befasuese duke zbuluar skuadrën tjetër të Premierligës që do të donte ta shihte kampione, përveç Liverpoolit.

Aktualisht, Arsenali është shumë pranë titullit të parë që nga viti 2004 nën drejtimin e Mikel Artetës, ndërsa Liverpooli ka dështuar të rivalizojë në krye pas triumfit sezonin e kaluar.

Gerrard, i cili është pa punë që nga largimi nga Al-Ettifaq, është lidhur nga tifozët me një rikthim të mundshëm në “Anfield” si trajner i përkohshëm nëse Arne Slot shkarkohet.

Me Liverpoolin jashtë garës për titull, Gerrard befasoi duke thënë se skuadra që do të donte të fitonte kampionatin është Newcastle United.

“Është disi e përshtatshme që jemi në dhomën e zhveshjes së Newcastle, sepse përveç Liverpoolit, nëse do të doja dikë të fitonte ligën, do të ishte Newcastle,” tha ai për “TNT Sports”.

“Ata janë skuadra ime numër dy në Premierligë. Nuk e kam thënë kurrë më parë, por ja ku jemi”, tha ai.

Ndërkohë, presioni mbi Slotin po rritet pas barazimit 1-1 ndaj Tottenham Hotspurit, ku tifozët e fishkëllyen ekipin në fund të ndeshjes.

Trajneri holandez do të ketë vetëm 12 muaj kontratë gjatë verës dhe Gerrard ka treguar qartë gatishmërinë për të ndihmuar klubin në çdo moment.

“Do të jem shumë i sinqertë: do ta ndihmoja Liverpoolin në çdo rol, në çdo moment. Dua që Sloti ta rregullojë situatën dhe ta rikthejë Liverpoolin në nivelin më të lartë,” ka thënë ai më herët.

Tani, Sloti përballet me një ndeshje vendimtare ndaj Galatasaray në Ligën e Kampionëve.

Liverpooli duhet të përmbysë humbjen 1-0, përndryshe pozita e trajnerit mund të vihet seriozisht në rrezik./GazetaExpress/