Një avokat sportiv ka sugjeruar se Gianluca Prestianni mund të ndërmarrë veprime ligjore ndaj Vinícius Júnior dhe Kylian Mbappé pas akuzave se ai përdori një fyerje raciste ndaj brazilianit.

Të martën (17 shkurt), ndeshja e parë e “play-offit” të Ligës së Kampionëve mes Benfica dhe Real Madrid u ndërpre përkohësisht.

Menjëherë pasi shënoi golin e vetëm të ndeshjes dhe u përfshi në një përplasje me Prestiannin, Vinícius vrapoi drejt gjyqtarit dhe pretendoi se ishte fyer me një term racist.

Gjyqtari François Letexier kryqëzoi krahët, duke sinjalizuar se protokolli kundër racizmit kishte hyrë në fuqi.

Vini Jr dhe formacioni i Real Madridit u larguan nga fusha. Pas konsultimit me trajnerin e Benficës, José Mourinho, “Los Blancos” u kthyen në fushë rreth 10 minuta më vonë dhe loja rifilloi.

Pas ndeshjes, disa lojtarë, përfshirë Trent Alexander-Arnold, Mbappé dhe Vinícius, dënuan komentet e pretenduara të Prestiannit.

Në një deklaratë të publikuar në Instagram, Vinícius tha: “Asgjë nga ajo që ndodhi sot këtu nuk është e re në jetën time dhe të familjes sime. Mora karton të verdhë për festimin e golit. Ende nuk e kuptoj pse. Nga ana tjetër, ishte thjesht një protokoll i zbatuar keq që nuk shërbeu për asgjë. Nuk më pëlqen të shfaqem në situata të tilla, aq më tepër pas një fitoreje të madhe kur titujt duhet të jenë për Real Madridin, por është e nevojshme.”

Prestianni reagoi duke publikuar një deklaratë të tijën në të njëjtën platformë, ku mohoi akuzat.

Argjentinasi shkroi: “Dua të sqaroj se në asnjë moment nuk kam drejtuar fyerje raciste ndaj lojtarit Vinícius Junior, i cili fatkeqësisht keqinterpretoi atë që mendoi se dëgjoi. Nuk kam qenë kurrë racist ndaj askujt dhe më vjen keq për kërcënimet që kam marrë nga lojtarë të Real Madridit.”

Të mërkurën (18 shkurt), organi drejtues i futbollit evropian, UEFA, konfirmoi se kishte emëruar një inspektor etike dhe disipline për të hetuar incidentin.

Mbetet e paqartë saktësisht çfarë është thënë, ndërsa hetimi i UEFA-s vazhdon.

Nëse shpallet fajtor, Prestianni mund të përballet me një pezullim prej 10 ndeshjesh, në përputhje me nenin 14 të rregullores disiplinore të UEFA-s (racizëm dhe sjellje diskriminuese).

Një lojtar mund t’i drejtohet Organit të Apelimit të UEFA-s dhe më pas CAS-it (Court of Arbitration for Sport) nëse dëshiron ta kundërshtojë sanksionin.

Por çfarë ndodh nëse Prestianni provon pafajësinë e tij, dhe a mund të ndërmarrë ai veprime ligjore ndaj Vinícius?

Pas ndeshjes së së martës, Fraser MacKinven, partner në firmën ligjore britanike “Burness Paull”, ku ai drejton departamentin e sportit dhe argëtimit foli për “SportBIBLE”.

I pyetur nëse Prestianni mund të ndjekë rrugë ligjore, avokati me bazë në Mbretërinë e Bashkuar shpjegoi se “mund të ketë disa pyetje interesante rreth faktit se ligjet e cilit shtet duhet të zbatohen, duke pasur parasysh natyrën ndërkombëtare të incidentit dhe palët e përfshira”.

Ai shtoi: “Megjithatë, bazuar në disa parime të përbashkëta të ligjeve për shpifjen në juridiksione të ndryshme, Prestianni mund të ketë potencialisht një pretendim për shpifje nëse në fund shpallet i pafajshëm nga UEFA.”

Pra, cilat janë elementet kyçe të një padie për shpifje?

MacKinven shpjegoi se deklaratat duhet të jenë publike dhe të identifikojnë qartë paditësin — në këtë rast Prestiannin — nëse ai vendos të ndjekë çështjen.

“Kjo duhet të jetë relativisht e lehtë për t’u vërtetuar, duke qenë se deklaratat janë regjistruar dhe transmetuar në TV dhe rrjete sociale,” tha ai.

Deklaratat duhet të dëmtojnë reputacionin e dikujt dhe mund, por jo domosdoshmërisht, të shkaktojnë humbje financiare.

I pyetur nëse edhe Mbappé mund të përballet me veprime ligjore pasi pretendoi se dëgjoi Prestiannin ta quante Viníciusin “majmun pesë herë”, MacKinven u përgjigj:

“Nëse një lojtar si Mbappé pretendon se ka dëgjuar fyerjen raciste kur në fakt nuk e ka dëgjuar, atëherë kjo ka shumë gjasa të përbëjë shpifje. Vlen të theksohet se Mbappé ndoshta nuk do të mund të mbështetej te mbrojtja e gabimit (pra duke menduar se e kishte dëgjuar fyerjen) si argument mbrojtës.”

Avokati shtoi: “Deklaratat duhet të jenë të pavërteta. Është e rëndësishme të theksohet se barra e provës ka shumë gjasa të bjerë mbi të paditurin për të provuar se deklaratat e tij janë të vërteta.

“Me fjalë të tjera, ata duhet të provojnë se Prestianni ka përdorur një fyerje raciste. Nëse arrijnë ta provojnë këtë, atëherë ka pak gjasa që pretendimi i Prestiannit të ketë sukses.”

MacKinven përfundoi duke shpjeguar se, nëse do të fitonte një çështje për shpifje, Prestianni me shumë gjasa do të kishte të drejtë për “kompensim financiar dhe një kërkim faljeje publike.”/GazetaExpress/