Olivier Giroud është gati të rikthehet në Francë. Të premten, klubi amerikan Los Angeles FC dhe sulmuesi francez njoftuan se kanë arritur një marrëveshje të përbashkët për të ndarë rrugët.
Giroud do të luajë ndeshjen e tij të fundit për LAFC këtë të diel ndaj Vancouver Whitecaps.
Ai është përfolur shumë për një kalim te Lille, ku klubi francez po punon intensivisht për të firmosur me 38-vjeçarin.
Në një deklaratë të klubit, bashkë-presidenti i LAFC, John Thorrington, tha:
“Olivier ka qenë një profesionist shembullor gjatë kohës së tij në LAFC. Ai solli përulësi dhe mentalitet fitues që ndikoi pozitivisht te të gjithë. Ka qenë një ambasador i shkëlqyer për klubin brenda dhe jashtë fushës. I jemi mirënjohës për gjithçka dhe i urojmë atij, bashkëshortes së tij Jennifer dhe familjes së tij, gjithë të mirat në kapitullin e radhës.”
Giroud iu bashkua LAFC verën e kaluar si lojtar i lirë nga AC Milan. Gjatë kohës në Amerikë, ai shënoi vetëm 5 gola dhe dha 3 asistime në 37 ndeshje.
Periudha e tij në SHBA përkoi me pjesëmarrjen e LAFC në Kupën e Botës për Klube, ku u eliminuan që në fazën e grupeve. Giroud pati pak ndikim, duke luajtur 161 minuta kundër Chelseat, Esperance dhe Flamengos, pa lënë gjurmë të rëndësishme.
Tashmë, pritet që Giroud t’i japë fund karrierës në vendlindje, me një rikthim të mundshëm në Ligue 1./GazetaExpress/
