Një total prej gjashtë klubesh të Serie A rrezikojnë të kenë të bllokuar merkaton e tyre të transferimeve që në janar, për shkak të ashpërsimit të rregullave financiare, sipas “TuttoMercatoWeb”.

Përveç Lazios, pesë klubet e tjera që përballen me këtë bllokim të mundshëm janë Napoli, Atalanta, Fiorentina, Torino dhe Genoa.

Çështja kryesore lidhet me ndryshimet në treguesin “Shpenzimet e Zgjeruara të Punës” (CLA) ndaj të Ardhurave (R). Pas një vendimi të fundit të Këshillit Federal, pragun e këtij raporti e kanë ulur në mënyrë agresive në 70%.

Klubet që nuk arrijnë të përmbushin këtë kufi të ri nuk do të mund të firmosin lojtarë të rinj, përveç nëse gjenerojnë fitime të menjëhershme kapitali (plusvalenze) ose sigurojnë injeksione të reja kapitali.

Ky rregull i ashpër vlen si për klubet që historikisht kanë menaxhuar me kujdes, ashtu edhe për ato që tashmë janë në vështirësi.

Të gjitha klubet duhet të dorëzojnë pasqyrat e tyre financiare që tregojnë situatën deri më 30 shtator, deri më 30 nëntor, për vlerësim, pas së cilës do të bëhet më e qartë shkalla e krizës për këto klube.

Raporti thekson se kjo masë përputhet me parametrat ekonomikë të UEFA-s që do të bëhen të detyrueshëm në vitin 2026, duke përfshirë edhe penalitetin e bllokimit të tregut të transferimeve./GazetaExpress/