Këshilli i Madh i Gjenevës ka miratuar një ligj të ri që ndalon përdorimin e veshjeve mbuluese të plota gjatë larjes në pishinat publike, përfshirë edhe forma si burka ujore.

Këto veshje, të përdorura nga disa gra myslimane, mbulojnë pjesën më të madhe të trupit gjatë qëndrimit në ujë.

Sipas ligjit të ri, në pishinat publike do të lejohen vetëm kostume banje që nuk kalojnë gjatësinë deri në gjunjë dhe që i lënë krahët të zbuluar, transmeton albinfo.ch.

Ligji u miratua të enjten në mbrëmje nga shumica e djathtë në Këshillin e Madh. Edhe pse në tekst nuk përmenden drejtpërdrejt këto veshje, në praktikë ato ndalohen. Ky ishte edhe qëllimi i projektligjit fillestar të propozuar nga Partia Popullore Zvicerane (SVP).

Kjo parti e arsyetoi nismën me argumente higjienike, duke theksuar gjithashtu se synon të dërgojë një mesazh kundër detyrimit të grave.

Nga ana tjetër, deputetët e majtë e kanë kritikuar ligjin, duke e cilësuar atë si ksenofob dhe duke paralajmëruar se mund të përjashtojë disa gra myslimane nga hapësirat publike.