Autoritetet e arbitrimit kanë pranuar se është bërë një gabim duke mos i akorduar Napolit një penallti në humbjen 3-0 ndaj Juventusit për faullin ndaj Rasmus Hojlund.

Incidenti shkaktoi polemika të dielën në “Allianz Juventus Stadium” në Torino, kur gjatë të njëjtës goditje standarde në zonë pati dy përplasje të ndryshme.

Fillimisht pati një kontakt mes Pierre Kalulu dhe Antonio Vergara, më pas Hojlund u duk se u rrëzua pasi u kap nga Gleison Bremer, i cili i kishte të dy krahët rreth sulmuesit.

Si gjithmonë në Serie A, rastet u analizuan në emisionin “Open VAR” në “DAZN Italia”, ku u pranua një gabim nga ana e VAR-it.

“Maurizio Mariani u tha atyre në dhomën e VAR-it se nuk e kishte parë situatën Bremer–Hojlund,” shpjegoi përfaqësuesi i CAN-it dhe ish-arbitri Dino Tommasi.

“Ai arbitroi shumë mirë në përgjithësi, por në këtë rast thjesht nuk e pa kontaktin e dytë. I pari mes Kalulu dhe Vergara është shumë i lehtë dhe nuk ka parametra të qartë për penallti. Megjithatë, Bremer e ka krahun rreth qafës së Hojlundit dhe e tërheq poshtë. Ky është padyshim faull dhe një tërheqje e qartë. Mariani pyeti pse nuk mund ta vlerësonte vetë, ndaj duhej të kishte një rishikim në fushë (On-Field Review) për Marianin”, tha ai.

VAR-i në këtë rast u kritikua se e përfundoi rishikimin shumë shpejt, gjë që autoritetet e konfirmojnë se çoi në një gabim.

“Pamjet ishin mjaft të qarta, faulli ishte evident. Nëse do të ishte bërë siç duhet dhe do të ishin kontrolluar kënde të tjera kamerash, arbitri do të ishte thirrur për ta parë vetë, sidomos pasi ai i tha VAR-it se nuk ishte në gjendje ta vlerësonte situatën në fushë,” shpjegoi Tommasi.

“Ne kemi punuar me të gjithë arbitrat e Serie A dhe B për të dhënë më shumë penallti për këto kapje, çka nga ana tjetër duhet të çojë në shumë më pak incidente të tilla. Kjo është një sjellje jo sportive që ne duam ta çrrënjosim”, përfundoi ai./GazetaExpress/