Raportet e së dielës tregojnë se gjyqtari Maurizio Mariani dhe asistenti Daniele Bindoni do të pezullohen për raundin e ardhshëm të ndeshjeve në Serie A, pas akordimit të një penalltie të diskutueshme gjatë fitores 3-1 të Napolit ndaj Interit të shtunën në mbrëmje.

Napoli u rikthye në krye të renditjes së Serie A falë golave të Kevin De Bruyne, Scott McTominay dhe Andre-Frank Zambo Anguissa, në një fitore 3-1 ndaj Nerazzurri-ve, të cilët kishin fituar shtatë ndeshje radhazi përpara përballjes së së shtunës.

Megjithatë, nga kampi i Interit ka pasur ankesa lidhur me vendimin për t’i dhënë Napolit një penallti pesë minuta para fundit të pjesës së parë.

Giovanni Di Lorenzo u gjend në zonën e penalltisë dhe ra pas kontaktit me Henrikh Mkhitaryan. Disa mendojnë, megjithatë, se Di Lorenzo kërkoi vetë kontaktin dhe se Mkhitaryan nuk bëri asnjë lëvizje të qëllimshme drejt kapitenit të Napolit, prandaj penalltia nuk duhej të ishte dhënë.

Tani, sipas La Gazzetta dello Sport, AIA (Shoqata Italiane e Gjyqtarëve) ka përfunduar se penalltia nuk duhej të ishte akorduar për Napolin mbrëmë.

Raportet e së dielës sugjerojnë se asistenti Bindoni ishte ai që sinjalizoi fillimisht për penallti, ndërsa Mariani nuk e dha në momentin e parë, por e ndryshoi vendimin pas rishikimit në VAR.

Asistenti Bindoni është kritikuar më shumë për sinjalizimin e penalltisë, megjithatë edhe Mariani është vënë në qendër të kritikave për ndryshimin e vendimit të tij fillestar.

Sipas La Gazzetta dello Sport, ka shumë gjasa që të dy gjyqtarët, të cilët morën pjesë edhe në finalen e Kupës së Botës U20 në Kili këtë javë, të mos përfshihen në raundin e ardhshëm të ndeshjeve të Serie A./GazetaExpress/