Një operacion policor i koduar “Rotondo”, i zhvilluar pas një hetimi dymujor, ka çuar në goditjen e një grupi të dyshuar për trafikim dhe shitje të armëve të zjarrit në Tiranë.
Lidhur me rastin janë sekuestruar 6 pistoleta të dyshuara të trafikuara nga Mali i Zi, me qëllim shitjen, kurse janë arrestuar në flagrancë 2 shtetasit që transportonin me automjet, armët e zjarrit.
Sipas policisë në Shqipëri është identifikuar dhe shpallur në kërkim një bashkëpunëtor i dy të arrestuarve.
“Si rezultat i një hetimi të kryer për 2 muaj, me metoda proaktive, në koordinim me Prokurorinë e Tiranës, shërbimet e Komisariatit të Policisë Nr. 4, në vijim të kontrolleve dhe punës operative, me objektiv goditjen e veprimtarive kriminale të trafikimit dhe shitjes së armëve të zjarrit, finalizuan operacionin e koduar “Rotondo”.
“Gjatë operacionit, u vunë në pranga shtetasit D. J., 31 vjeç, banues në Shkodër dhe F. Gj., 22 vjeç, banues në fshatin Domje.
Automjeti që drejtonte 22-vjeçari dhe ku ishte pasagjer shtetasi D. J., u ndalua për kontrolle, në bashkëpunim me shërbimet e Forcës së Posaçme Operacionale të DVP Tiranë, në vendin e quajtur “Rrethi i Freskut”. Nga kontrollet në automjet, u gjetën 6 armë zjarri (pistoleta SigSauer) të dyshuara të trafikuara nga Mali i Zi, me qëllim shitjen në këtë zonë.
Armët e zjarrit u sekuestruan bashkë me automjetin tip “Volksëagen” që drejtonte shtetasi F. Gj., si dhe me 4 celularë”, njofton policia shqiptare
