Boksieri shqiptar Granit Shala nuk ka arritur ta mbrojë titullin IBF International, duke u mposhtur nga kroati Petar Milas në një duel të fortë të zhvilluar në Gjermani.

Milas, i cili konsiderohej favorit para përballjes, e mbylli ndeshjen me nokaut në raundin e 10-të, pas një presioni të vazhdueshëm ndaj Shalës.

Boksieri shqiptar e nisi mjaft mirë meçin, duke dominuar raundet e para dhe duke treguar formë të mirë në ring.

Megjithatë, me kalimin e raundeve, Milas tregoi përgatitje fizike më të lartë dhe filloi të rrisë intensitetin e goditjeve, duke përfituar nga lodhja e Shalës.

Në raundin e fundit, kroati e rrëzoi Shalën me një goditje të fuqishme me të djathtën. Edhe pse Shala u ngrit pas shtatë sekondash, Milas vazhdoi me sulme të njëpasnjëshme, duke e detyruar gjyqtarin të ndërpresë duelin.

Kjo përballje vlente për titullin IBF International dhe u mbajt në Gjermani. Pavarësisht humbjes, Shala pritet të vazhdojë përgatitjet për t’u rikthyer edhe më i fortë në ring.

Petar Milas vazhdon të konfirmojë reputacionin e tij me statistika mbresëlënëse: 20 fitore, prej tyre 16 me nokaut, dhe vetëm një humbje.

Ndërkohë, Granit Shala regjistron humbjen e dytë në karrierë, përballë 18 fitoreve të deritanishme. /GazetaExpress