Kapiteni i Sunderland, Granit Xhaka, ka deklaruar se derbi i së dielës kundër Newcastle United është ndeshja më e madhe mes rivalëve që ka përjetuar në gjithë karrierën e tij – edhe më e madhe se derbi Arsenal–Tottenham apo sfidat e Champions League ku ka marrë pjesë.

Xhaka, i cili u transferua te Sunderland nga Bayer Leverkusen në verë për 13 milionë paund dhe u emërua kapiten pak javë më vonë, është bërë shpejt lider i skuadrës dhe një figurë e dashur për tifozët. Ai shënoi golin e tij të parë për klubin në nëntor, në barazimin 1-1 ndaj Everton.

Duke folur për Premier League para ndeshjes së shumëpritur, Xhaka theksoi peshën e madhe të derbit Wear-Tyne brenda skuadrës:
“Kam pasur shumë rivalitete në karrierë, por mendoj se kjo do të jetë më e madhja. Synimi ynë është të fitojmë dhe t’u japim tifozëve diçka të madhe,” u shpreh ai.

Derbi i së dielës është i pari në ligë mes dy rivalëve pas nëntë vitesh dhe i pari në Stadium of Light që nga viti 2016. Sunderland vjen pas humbjes 3-0 ndaj Manchester City, ndërsa Newcastle është i pamposhtur në katër ndeshjet e fundit, por ka vuajtur në transfertë këtë sezon.

Atmosfera pritet të jetë elektrizuese, teksa të dyja skuadrat kërkojnë një fitore që mund të ndryshojë drejtimin e sezonit. /GazetaExpress