Kapiteni i Sunderlandit, Granit Xhaka, u përfshi në një përplasje të ashpër me një tifoz gjatë minutave të fundit të humbjes 3-1 të skuadrës së tij ndaj West Hamit në Premier League.
West Hami kaloi në epërsi 3-0 që në pjesën e parë në London Stadium, falë golave të Crysencio Summerville, Jarrod Bowen dhe Mateus Fernandes.
Sunderlandi u kundërpërgjigj përmes Brian Brobbey në minutën e 66-të, por humbi mundësinë për t’u ngjitur deri në vendin e pestë në tabelën e Premierligës.
Xhaka, i cili ka qenë një nga lojtarët kyç të “Black Cats” këtë sezon, mungoi në ndeshjen ndaj West Hamit për shkak dëmtimi.
Megjithatë, reprezentuesi zviceran me prejardhje shqiptare udhëtoi me pjesën tjetër të skuadrës dhe e ndoqi ndeshjen nga tribunat, pas stolit teknik.
Nga fundi i ndeshjes, Xhaka pati një përballje të furishme verbale me një tifoz që ishte ulur në katin e dytë të tribunës.
Situata u vu re nga zyrtarët e ndeshjes, me arbitrin Thomas Bramall që ndaloi për pak çaste portierin e West Hamit, Alphonse Areola, të ekzekutonte një goditje të lirë derisa incidenti të qetësohej.
Loja rifilloi rreth 20 sekonda më vonë, por përplasja mes Xhakës dhe tifozit vazhdoi edhe pas vërshëllimës përfundimtare.
Deri atëherë, disa stewardë kishin hyrë në atë sektor të tribunës, ndërsa kapiteni i Sunderlandit shihej duke gjestikuluar në mënyrë të egër drejt një burri që mbante një fëmijë të vogël.
Burri u pa duke bërë një gjest fyes me dorë drejt Xhakës, përpara se të qeshte me të.
Sa i përket futbollit, fitorja 3-1 e West Hamit është e dyta radhazi në Premier League nën drejtimin e Nuno Espirito Santo.
“Hammers” tani janë dy pikë pas Nottingham Forestit të vendit të 17-të, i cili do të përballet me Brentfordin të dielën.
West Hami nuk ka rënë nga Premier League që nga viti 2011, por ka pasur pakënaqësi në rritje mes tifozëve lidhur me mungesën e perceptuar të investimeve dhe qëndrimin e përgjithshëm ndaj klubit nga pronari kryesor, David Sullivan./GazetaExpress/
