Gruaja e Bruce Willis, Emma Heming, ka zbuluar se martesa e tyre ka “ndryshuar” për shkak të tensioneve që solli demenca e aktorit.

Ai u tërhoq nga Hollivudi në vitin 2022 pasi u diagnostikua me afazi – një çrregullim i trurit që dëmton aftësitë gjuhësore.

Në vitin 2023, familja njoftoi se sëmundja kishte “përparuar” dhe ai ishte diagnostikuar me demencë frontotemporale (FTD).

Ndryshe nga Alzheimeri, FTD nuk shkakton menjëherë humbje kujtese, por prek fillimisht pjesët e trurit që lidhen me gjuhën dhe personalitetin.

Emma – e cila e ka zhvendosur Bruce në një shtëpi të veçantë ku kujdeset një ekip i përhershëm – po boton një libër për përkujdesjen ndaj tij me titull The Unexpected Journey.

“FTD nuk bërtet, ai pëshpërit. Është shumë gri të dish ku mbaron Bruce dhe ku fillon sëmundja,” tha ajo për People.

“Nisa të vëreja se belbëzimi i tij po kthehej [dhe] bisedat nuk po përputheshin më. Ishte e vështirë të vendosja gishtin pse dhe çfarë po ndodhte.”

Çrregullimi hyri edhe në jetën e tyre familjare dhe çifti – që kanë dy vajza, Mabel 13 vjeçe dhe Evelyn 11 vjeçe – përjetuan tensione martesore që nuk i kishin përjetuar më parë.

“Besoj se për shumicën, deri në momentin që merr diagnozën, ti tashmë je në atë rol,” shpjegoi Emma, duke thënë se konfirmimi zyrtar i sëmundjes solli njëfarë lehtësimi: ‘Ah, mirë, kjo nuk ishte nga burri im, por nga sëmundja që po merrte pjesë të trurit të tij.’

Në fillimet e sëmundjes, ajo ndihej “shumë e izoluar” dhe “tepër e frikësuar për të folur me dikë”, teksa përpiqej të balanconte kujdesin ndaj Bruce-it, rolin e nënës dhe mbajtjen e privatësisë.

“Unë isha në aq shumë trishtim dhe errësirë për kaq gjatë,” tha ajo, 47 vjeç. “Më dukej sikur kjo po ndodhte vetëm me ne.”

Më vonë, mënyra e saj e përballimit ndryshoi, teksa kuptoi se “do të ishte e dobishme të flisja hapur për këtë dhe të rrisja ndërgjegjësimin që njerëzit të shkonin më shpejt te mjeku, të diagnostikoheshin më shpejt dhe të përfshiheshin në prova klinike.”

Ajo shtoi: “FTD shpesh diagnostikohet gabimisht si bipolaritet, krizë e moshës së mesme apo depresion. Nuk është fare në radar, prandaj besoj se dalja me diagnozën e Bruce ishte kaq e rëndësishme.”

Si pasojë, kujtimet e saj janë shkruar për të qenë “libri që do të kisha dashur dikush të ma dorëzonte ditën që morëm diagnozën.” /GazetaExpress/