Pep Guardiola ka deklaruar se Manchester City “nuk kishte luajtur kështu prej shumë kohësh”, pas fitores 5-2 ndaj Juventusit, ndërsa i uron fat Kevin De Bruyne në aventurën e tij të re te Napoli i Antonio Contes. “Është një klub i veçantë me njërin nga trajnerët më të mirë të të gjitha kohërave.”
Cityzens kishin nevojë për fitore për të mbyllur grupin në vendin e parë në Kupën e Botës për Klube, pasi tashmë kishin siguruar kualifikimin në fazën e 1/8-ës së bashku me Juventusin, që gjithashtu kishin mposhtur Wydad dhe Al-Ain.
Në Orlando ishte një ndeshje me një drejtim të vetëm, ku Manchester City fitoi me rezultat të thellë 5-2, dhe mund të kishte shënuar edhe më shumë po të mos ishte për pritjet e Michele Di Gregorio.
“Sigurisht që jam i kënaqur, e mundëm një skuadër që kishte zhvilluar dy ndeshje të jashtëzakonshme më parë,” tha Guardiola për kanalin italian Mediaset.
“Juventusi mbetet gjithmonë Juventus, por ne nuk kishim luajtur në këtë mënyrë prej shumë kohësh. Vazhdojmë të besojmë se kishim një ekip të mirë edhe sezonin e kaluar, por u goditëm nga, sikur, 200 mijë lëndime. Tani jemi gjetur sërish. Ka ende rrugë për të bërë, nuk duhet të flasim, por të punojmë fort.”
“I kishim fituar dy ndeshjet e kaluara të grupit, por nuk e pata të njëjtën ndjesi. Duhet ta rigjejmë identitetin tonë – nuk ka rëndësi nëse fitojmë apo jo. E rëndësishme është ta gjejmë veten sërish.”
Erling Haaland qëndroi në stol në pjesën e parë, por shënoi sapo hyri në lojë në pjesën e dytë, edhe pse goli ishte më shumë i rastësishëm.
“Ky djalë i shënon golat, por duhet të kuptojë se ka konkurrencë për vendin në formacion,” paralajmëroi Guardiola.
“Omar Marmoush luajti mirë. Të gjithë duhet të japin maksimumin, përndryshe do të jetë e vështirë për të gjithë.”
Në fund, Manchester City është ndarë këtë verë me De Bruyne, pasi nuk i ofroi kontratë të re, dhe ai e nisi një eksperiencë të re si lojtar i lirë te Napoli i Contes.
“E dua shumë. Këto vite nuk do të kishin qenë të mundshme pa kontributin e tij,” u shpreh Guardiola.
“Ishte një vendim shumë i vështirë. I uroj gjithë të mirat. Po shkon në një klub të veçantë me një nga trajnerët më të mëdhenj ndonjëherë. Antonio gjithmonë arrin të marrë atë që i duhet. I uroj Kevin-it vetëm suksese dhe shumë lumturi.”
