Mesfushori Rodri do të mungojë në ndeshjen e Premierligës të së shtunës kundër Evertonit për shkak të një dëmtimi, dhe trajneri Pep Guardiola ka pranuar se nuk e di se kur lojtari do të rikthehet.

29-vjeçari spanjoll tha se “ndjeu pak dhimbje në kofshë” pasi u detyrua të largohej nga loja vetëm pas 22 minutash në fitoren ndaj Brentfordit, përpara ndërprerjes ndërkombëtare.

Rodri, fitues i Topit të Artë 2024 – çmimi që i jepet futbollistit më të mirë të vitit – humbi pjesën më të madhe të sezonit të kaluar pas një dëmtimi të rëndë në gju, një muaj pas fillimit të kampionatit.

Ai u rikthye në lojë në ndeshjen e parafundit të sezonit kundër Bournemouthit dhe më pas mori pjesë në Kampionatin Botëror të Klubeve, por Guardiola kishte deklaruar në gusht se ai kishte pësuar një tjetër problem fizik.

Rodri mungoi në ndeshjen hapëse të këtij sezoni kundër Wolves, dhe megjithëse ka luajtur shtatë herë për Cityn në të gjitha garat, Guardiola tha se klubi “ka tentuar të jetë i kujdesshëm” me të, pasi ai ka luajtur plotësisht 90 minuta vetëm dy herë këtë sezon.

Ndërkohë, mesfushori Mateo Kovačić është i gatshëm për lojë, pasi nuk ka luajtur ende këtë sezon, ndërsa Omar Marmoush dhe Rayan Aït-Nouri janë rikthyer në stërvitje dhe “janë afër rikthimit”, sipas Guardiolës.

Guardiola, i cili iu bashkua Manchester Cityt në vitin 2016, po afrohet në dekadën e tij të parë në klub, gjatë së cilës ka fituar gjashtë tituj të Premierligës, Ligën e Kampionëve dhe dy Kupa të Anglisë (FA Cup).

Ai është gjithashtu trajneri më jetëgjatë aktualisht në Premierligë, dhe këtë fundjavë përballet me David Moyes, trajnerin e Evertonit, i cili ka drejtuar mbi 700 ndeshje në ligën angleze.

City është në një seri prej shtatë ndeshjesh pa humbje në të gjitha garat dhe po synon të rikuperojë zhgënjimin e sezonit të kaluar, kur për herë të parë pas tetë vitesh përfundoi një sezon pa fituar asnjë trofe të madh.

“E ndjej ende energjinë për t’i ndihmuar lojtarët të bëjnë një sezon më të mirë se ai i kaluar,” tha Guardiola. “Ky është objektivi im. Nuk ulem kurrë në nëntor duke thënë ‘do ta fitojmë këtë apo atë’. Nuk e di çfarë do të ndodhë ndaj Evertonit, por para pushimit ndërkombëtar ishim shumë larg kreut të tabelës, ndërsa tani jemi më afër. Ne duam të jemi sa më pranë majës kur të vijë koha e garave vendimtare – ky është synimi im. Shoh që po bëjmë shumë gjëra më mirë se sezonin e kaluar, dhe ndeshje pas ndeshjeje po përmirësohemi. Kjo më jep energji, sepse puna nuk ka përfunduar – është ende një ‘punë e papërfunduar’, dhe për këtë arsye jam këtu.”/GazetaExpress/