Pep Guardiola ka shpjeguar pse u dha një ditë të plotë pushimi lojtarëve të Manchester City-t, përfshirë edhe portierin italian Gianluigi Donnarumma, përpara ndeshjes së Ligës së Kampionëve kundër Borussia Dortmund.

Zakonisht, City stërvitet një ditë para një ndeshjeje evropiane, me 15 minutat e para të hapura për median, por këtë herë Guardiola vendosi që skuadra e tij të kishte më shumë kohë për rikuperim pas përpjekjeve të fundit në Premier League.

“Do të stërvitemi nesër në mëngjes,” tha trajneri katalanas në konferencën për shtyp para ndeshjes, sipas The Independent. “E kam bërë disa herë më parë. Ndonjëherë e preferoj kështu. Ishte një ndeshje shumë kërkuese ndaj Bournemouth, kështu që preferova që ata të qëndronin në shtëpi.”

Skuadra e Guardiolës e mundi Bournemouth-in të dielën, ndërsa Dortmund ka pasur më shumë pushim pasi luajti të premten. Trajneri i City-t pranoi se oraret janë më të favorshme për skuadrat në liga të tjera.

“Në Gjermani dhe Francë përpiqen të luajnë të premten,” shtoi ai. “Këtu është krejtësisht e kundërta. Por nëse nuk më pëlqen, mund të shkoj të stërvitem në Gjermani ose Francë.”

“Cityzens” do t’i rifillojnë përgatitjet të mërkurën në mëngjes, përpara se të presin Borussia Dortmund në Etihad atë mbrëmje./GazetaExpress/