Presidenti i Guatemalës, Bernardo Arevalo, shpalli të dielën gjendje të jashtëzakonshme në të gjithë vendin, pas një vale dhune nga bandat kriminale që la pas tetë policë të vrarë dhe mori kontrollin e tre burgjeve gjatë fundjavës.

“Kam vendosur të shpall gjendjen e jashtëzakonshme për 30 ditë, duke filluar nga sot,” tha Arevalo në një fjalim drejtuar kombit.

Masa përfshin pezullimin e disa dispozitave kushtetuese dhe synon të luftojë bandat Barrio 18 dhe Mara Salvatrucha, të cilat Shtetet e Bashkuara dhe Guatemala i kanë shpallur organizata “terroriste”. Këto grupe akuzohen për vrasje me pagesë, zhvatje dhe trafik droge.

Autoritetet paralajmërojnë për një përpjekje të ashpër për rikthimin e rendit në vend, ndërsa komuniteti ndërkombëtar ndjek me shqetësim situatën.