Napoli ka zyrtarizuar transferimin e Miguel Gutierrez nga Girona FC me një kontratë të përhershme, për një shumë të raportuar prej 20 milionë eurosh me bonuse të përfshira.

Mbrojtësi i majtë mbërriti të hënën në mëngjes për të kryer testet mjekësore në klinikën sportive Villa Stuart në Romë. Pas përfundimit të tyre, ai firmosi një kontratë pesëvjeçare.

Siç është traditë te Napoli, lajmi u dha fillimisht nga presidenti Aurelio De Laurentiis në rrjete sociale, ndërsa pak minuta më vonë u publikua edhe komunikata zyrtare në faqen e klubit.

Gutierrez i bashkohet skuadrës së Napolit

Gutierrez, i cili mbushi 24 vjeç muajin e kaluar, ka qenë pjesë e rregullt e përfaqësueses së Spanjës U-21 dhe ka luajtur një rol kyç edhe në skuadrën olimpike.

I rritur në akademinë e Real Madrid, ai u shit te Girona në vitin 2022 për 4 milionë euro, ku shpërtheu me paraqitjet e tij.

Kostoja e transferimit është rreth 18 milionë euro plus 2 milionë në formë bonusesh. Megjithatë, Girona do të përfitojë vetëm 50% të shumës, pasi pjesa tjetër i takon Real Madridit.

Testet mjekësore kishin rëndësi të veçantë, pasi lojtari pësoi një dëmtim në kyçin e këmbës në maj që kërkoi ndërhyrje kirurgjikale. /GazetaExpress/