Erling Haaland po tregohet një “përbindësh” i vërtetë para portave kundërshtare.
Sulmuesi norvegjez po vazhdon të thyejë rekorde, shkruan “Gazeta Express”.
Të shtunën që shkoi, ylli i Manchester Cityt i realizoi tre gola në ndeshjen kualifikuese të Botërorit 2026 kundër Izraelit në Oslo.
Golat e realizuar në minutat 27, 63 e 72 e dërguan ish-futbollistin e Salzburgut e Borussia Dortmundit në kuotën e 12 golave në kualifikimet e Kupës së Botës.
Kështu, gjiganti i sulmit po e prin Kombëtaren e tij drejt gjashtë fitoreve radhazi, ndërsa “hat-trick”-u ndaj izraelitëve vjen pas pesëgolëshit që e shënoi paraprakisht në muajin e kaluar në fitoren 11-1 ndaj Moldavisë.
Me këtë rast, Haaland ishte bërë lojtari i parë që nga viti 1977 që shënon aq shumë gola në një ndeshje kualifikuese të Botërorit në eliminatoret evropiane.
Pas tregolëshit ndaj Izraelit, 25-vjeçari arriti në kuotën e 51 golave për Norvegjinë dhe atë në veç 46 ndeshje.
Kështu, ai regjistroi rekord absolut për aq shumë gola të shënuar në aq pak ndeshje.
Sipas Opta, norvegjezi e arriti këtë moment historik më shpejtë se yjet si Neymar Junior, Kylian Mbappe, Harry Kane, Robert Lewandowski, e mbi të gjitha më shpejt se legjendarët Lionel Messi dhe Cristiano Ronaldo.
Erling Haaland është një “monstrum” para portës. /Gazeta Express
