Në një përballje të fortë në Split, Dinamo City u përball me Hajduk Split para rreth 32 mijë tifozësh, ku skuadra kroate arriti të fitojë me rezultat 2:1 në ndeshjen e parë të raundit të tretë kualifikues në Ligën e Konferencës.

Trajneri i Dinamos, Ilir Daja, vlerësoi atmosferën elektrizuese në stadium dhe e pranoi se ishte një sfidë e vështirë për ekipin e tij.

Ai shprehu shpresën që në ndeshjen kthyese, e cila do të zhvillohet në stadiumin “Air Albania”, Dinamo të marrë mbështetjen e gjerë të tifozëve shqiptarë, përfshirë ata nga grupet e ndryshme të klubeve shqiptare.

“Ishte e vështirë të luajmë ndaj Hajdukut para 33 mijë njerëzve. Atmosfera ishte fantastike dhe ne po ashtu do të luajmë në stadiumin nacional. Shpresojmë që edhe tifozët e skuadrave tjera shqiptare do të na përkrahin,” tha Daja.

Ndeshja kthyese pritet të jetë një sfidë me tension të lartë, ku mbështetja nga tribunat mund të bëjë diferencën për Dinamon në rrugën drejt fazës së mëtejshme të kompeticionit evropian.