Në parkingun e Klinikës së Pediatrisë në QKUK, zonja nga Peja, Blerina Boqolli, sot e parkoi veturën e saj. Nga aty me një batanije të mbështjellë e kishte çuar djalin e saj, 3-vjeçarin, Idealin, për t’i kryer disa kontrolle pranë pediatërve të klinikës. Në veturën që e kishte lënë para hyrjes, asaj iu vodhën nga persona ende të panjohur dy çanta. Njëra çantë e saj dhe tjetra me gjithë dokumentacionin e djalit, të cilin me datë 20 janar, do ta dërgojë për shërim në Turqi. Express ka biseduar me nënën e vogëlushit. Ajo ka shpjeguar se si ka ndodhur e gjithë ngjarja. Ndërkohë rastin ajo e ka paraqitur në polici
Gentiana HASANI
Ideali 3 vjeç në këto ditë të ftohta thuajse dy-tri herë në javë e merrte rrugën nga Peja për në QKUK bashkë me nënën e tij Blerinën. Qëllimi që kishin shkuar atje ishte që Ideali t’i merrte terapitë e t’i kryente kontrollet pranë mjekëve pediatër të Qendrës Klinike dhe Universitare të Kosovës. Kjo pasi që 3-vjeçari ka më shumë se një muaj që është diagnostikuar me sëmundjen e leukemisë. Shërimin për të njëjtën e ka gjetur në Turqi, shtet ky në të cilin ata kanë planifikuar që të udhëtojnë me datë 20 të këtij muaji.
Por një ngjarje e rëndë i ka ndodhur nënës së Idealit. Asaj nga vetura që ishte parkuar në oborrin e Pediatrisë i janë vjedhur dy çanta. Çanta e saj personale dhe një çantë e llaptopit në të cilën ajo e kishte lënë të gjithë dokumentacionin e djalit me të cilin do të nisen më 20 janar në Turqi.
Gazeta Express ka kontaktuar me Blerinën. Ajo ka shpjeguar se si ka ndodhur e gjithë ngjarja.
“Unë bashkë me djalin sot në mëngjes u nisëm nga Peja për në Klinikën e Pediatrisë. Aty Ideali tash e një kohë i kryen kontrollet ngase është diagnostikuar me leukemi. E mora djalin nga vetura, i lashë çantat, ngase djalin e kapa në krah, e mbështolla se ishte ftohtë dhe u nisa drejt klinikës”, thotë ajo.
Ajo tregon se për më shumë se gjysmë ore ka qëndruar pranë djalit i cili po i kryente kontrollet nga mjekët pediatër të QKUK-së.
“Qëndrova në klinikë për rreth 40 minuta. Më pas dola edhe e pashë që çantat nuk janë aty. Unë një lutje e kam: që vetëm dokumentacionet e djalit të m'i kthejnë. Me datë 20 janar do ta dërgojmë në Turqi për shërim”, ka rrëfyer nëna e Idealit, të cilës persona ende të panjohur ia vodhën sot çantat nga vetura.
E gjithë rastin kjo zonjë e ka paraqitur në Policinë e Kosovës.
Ndërkohë, për fatin e keq, në zonën ku asaj i janë vjedhur çantat nuk ka kamera të sigurisë. Kështu kanë deklaruar për Express zyrtarë të QKUK-së.
Të gjithë ata që kanë informacione dhe që hasin në dokumente me emrin e Ideal Boqollit, të paraqiten pranë stacionit më të afërt të policisë ose në numrin e nënës së 3-vjeçarit, Blerina Boqolli: 043555300.
