Trajneri i Barcelonës, Hansi Flick, u shfaq i kënaqur pas fitores 5-0 ndaj Daegu FC të dielën, ndeshja e fundit e turit parasezonal në Azi. Ky sukses në Korenë e Jugut e çon bilancin e Barcelonës në tre fitore, me 15 gola të shënuar dhe vetëm katër të pësuar në tri ndeshje.

Gjatë këtyre tre ndeshjeve, shumica e lojtarëve të Barcelonës morën minuta në fushë. Portieri Iñaki Peña ishte i vetmi që nuk luajti aspak, ndërsa i riu Diego Kochen pati 15 minuta lojë kundër Daegu.
“Nuk ka asgjë për të thënë për këtë. Kemi 26 lojtarë, katër portierë. Jam i kënaqur me atë që kam parë nga ata në stërvitje,” tha Flick për MD.

Një tjetër lojtar që u aktivizua në minutat e fundit për të zëvendësuar Pau Cubarsi ishte Hector Fort. Në total, Fort luajti pak më shumë se 45 minuta gjatë turit dhe është përfolur shpesh për një largim të mundshëm nga klubi.

“Jam i kënaqur me atë që pashë nga Hector Fort. Ai u stërvit mirë dhe luajti mirë ditën tjetër. Azi ishte një pjesë shumë e rëndësishme e përgatitjeve për mua dhe kemi edhe dhjetë ditë të tjera para ndeshjes me Mallorcën.”

Për herë të parë, huazimi i ri Marcus Rashford u vendos në qendër të sulmit pa praninë e Robert Lewandowskit ose Ferran Torres në pjesën e dytë, megjithëse ende operoi më shumë në krahun e majtë. Mbrojtësi i majtë Gerard Martin gjithashtu luajti ndeshjen e dytë si qendërmbrojtës.

“Rashford mund të luajë si numri nëntë ose si numri njëmbëdhjetë… E vendosëm në atë pozicion sepse Ferran kishte disa probleme. Sa i përket Gerardit, testuam nëse mund të përshtatej si qendërmbrojtës. E njëjta gjë ndodhi edhe me Ericun, i cili u përshtat në një pozicion tjetër nga ai i zakonshmi, dhe tani po e provojmë edhe me Gerardin. Është e mirë që mund të luajë në disa role.”

Kundër Daegu, mesfushorët e rinj Dro Fernandez dhe Toni Fernandez lanë përshtypje të mirë, me të dy 17-vjeçarët që shënuan gjatë parasezonit.

“Është shumë e rëndësishme t’i kemi lojtarët e rinj pranë, në stol. Ishte shumë e rëndësishme për ne që mundëm të ndryshonim formacionin çdo pjesë. Nuk ishte e lehtë për shkak të kushteve atmosferike, por ata bënë një punë të mirë. Tani do të kthehemi në shtëpi për dy ditë pushim dhe të enjten do të vazhdojmë përgatitjet.”