Kryetari i Aleancës për Ardhmërinë e Kosovës, Ramush Haradinaj, priti në takim Emanuele Giaufret, Zëvendësdrejtor Menaxhues për Ballkanin Perëndimor në Shërbimin Europian për Veprim të Jashtëm.

Gjatë takimit u diskutua për zhvillimet aktuale politike në vend dhe rajon, proceset integruese euroatlantike, si dhe rëndësinë e thellimit të bashkëpunimit me Bashkimin Europian.

Haradinaj theksoi përkushtimin e Aleancës për avancimin e agjendës europiane të Kosovës dhe forcimin e partneritetit me aleatët ndërkombëtarë.

Ai tha se Kosova gjatë këtyre viteve ka ngecur në agjendën integruese euroatlantike, veçanërisht në synimin për anëtarësim në NATO dhe në Bashkimin Europian.

Sipas tij, është jetike që vendi "të rikthehet në binarë të sigurt, përmes vendimmarrjes së përgjegjshme dhe thellimit të bashkëpunimit me partnerët strategjikë".

Haradinaj ritheksoi se orientimi euroatlantik mbetet rruga e vetme për stabilitetin, sigurinë dhe zhvillimin e qëndrueshëm të Kosovës.