Kryeministri në detyrë, Ramush Haradinaj ka treguar pse nuk mori pjesë në takimin me përfaqësuesin e lartë të BE’së për Politikë të Jashtme dhe Siguri, Josep Borrell. Haradinaj ka thënë se arsyeja e mospjesëmarrjes në këtë takim ka qenë agjenda e ngjeshur, raporton Express.

Përmes një postimi në llogarinë e tij në Facebook, Haradinaj ka thënë qëndrimi politik i Aleancës për Ardhmërinë e Kosovës është prezantuar nga përfaqësuesi i saj, Besnik Tahiri.

“Propozimi nga BE për agjendë të përbashkët në Obiliq për inaugurimin e filtrave të ri me projektin “Green Deal” – për të cilin falënderojmë Bashkimin Evropian, ishte i pamundur të akomodohet në agjendën time për shkak të angazhimeve dhe obligimeve të përcaktuara më herët”, ka shkruar ai.

Ndryshe, në takim kanë marrë pjesë lideri i LV-së, Albin Kurti, ai i LDK-së, Isa Mustafa, Besnik Tahiri, anëtari i kryesisë së AAK-së, kryetari i Nismës Socialdemokrate, Fatmir Limaj, dhe kryetari i Listës Serbe, Goran Rakiq. /Express