Eden Hazard thotë se refuzoi “shumë para” nga një klub që e kontaktonte “çdo vit”, pasi i kishte bërë një premtim vetes në vitin 2012.
Hazard, i cili njoftoi pensionimin në tetor 2023 në moshën 32-vjeçare, njihet më së shumti për periudhat te Chelsea dhe Real Madrid, por aventura e tij te Lille në Ligue 1 konsiderohet si ndër më të rëndësishmet në karrierën e tij.
Pasi debutoi si profesionist me Lille në vitin 2007, belgu zhvilloi 194 ndeshje, shënoi 50 gola dhe fitoi titullin kampion në sezonin 2010-11, përpara se të transferohej për 30 milionë paund.
Më pas ai u bë një nga lojtarët më të mirë në botë te Chelsea, duke shënuar 110 gola në 352 ndeshje.
Një transferim i madh te Real Madrid, që besohet se kapte vlerën fillestare prej 88.3 milionë paund, u realizua në verën e vitit 2019. Megjithatë, karriera e tij mund të kishte marrë një tjetër drejtim nëse do të kishte pranuar ofertën e Paris Saint-Germain.
PSG kishte qenë prej kohësh admirues i Hazardit. Sipas vetë lojtarit, ata e kontaktonin “çdo vit”.
Duke folur për “RMC”, sipas “Mundo Deportivo”, Hazard tha se refuzoi kalimin te gjigantët e Ligue 1 pasi i kishte bërë një premtim vetes.
“Çdo vit kisha kontakt me PSG. Isha shumë i qartë për këtë. Kur u largova nga Lille, i thashë vetes: ‘Nuk dua të kthehem në Francë për asnjë klub tjetër përveç Lille. Nëse një ditë kthehem, do të jetë për të luajtur për Lille dhe për ta mbyllur karrierën aty’.
Për njerëzit e Lille dhe për veriun, nuk doja të shkoja të luaja për PSG. Ishte një klub i madh. Nasser (Al-Khelaïfi) vinte, kishte shumë para dhe gjithmonë një ekip për të luajtur në Ligën e Kampionëve.”
Hazard shtoi: “Meqë gjërat po shkonin shumë mirë te Chelsea, ëndrra ime më pas ishte të shkoja te Real Madrid, jo te PSG.”
Pas vetëm 54 paraqitjeve në kampionat gjatë një periudhe katërvjeçare të mbushur me dëmtime në Madrid, kontrata e tij me “Los Blancos” u ndërpre në verën e vitit 2023.
Megjithatë, ai theksoi se kishte edhe anë pozitive nga koha e tij në Madrid:
“U ndjeva si një fëmijë gjatë prezantimit tim në ‘Bernabeu’. Para se të vija te Real Madrid, kisha dëgjuar shumë paralajmërime për dhomën e zhveshjes dhe vështirësinë për t’u marrë me lojtarët e mëdhenj.
Por realiteti ishte krejt ndryshe; pritja ishte fantastike nga të gjithë, nga Zidane te stafi teknik dhe lojtarët. U ndjeva shumë rehat që nga dita e parë. Ramos, Modric dhe Kroos më pritën shumë mirë. Gjithçka shkoi perfekt.”
Hazard përfundoi: “Nuk erdha këtu për të zëvendësuar Cristiano Ronaldon. Ai shënonte shumë gola në çdo ndeshje; ndonjëherë unë nuk shënoja asnjë. Erdha këtu për të qenë Eden Hazard dhe për ta shijuar futbollin.”/GazetaExpress/
mmmmm
