Ndeshja e sontme e Champions League mes Manchester City dhe Napolit do të shënojë një ribashkim mes Antonio Contes dhe Pep Guardiolës, dhe edhe pse spanjolli ka një bilanc shumë më të mirë në këtë kompeticion, italiani ka epërsi në përballjet direkte.

Conte dhe Guardiola ribashkohen sonte në ndeshjen e Champions League mes Manchester City dhe Napolit, dhe takimi mes dy trajnerëve është padyshim një nga pikat kryesore të vëmendjes në Etihad Stadium.

Vështirësitë e Contes në Champions League

Guardiola është një nga specialistët e Champions League, duke fituar trofeun tre herë si trajner, ndërsa Conte nuk ka shkuar kurrë përtej çerekfinaleve në karrierën e tij si trajner.

Për më tepër, trajneri i Manchester City ka fituar 112 nga 181 ndeshje në Champions League, 61%, ndërsa Conte ka fituar 15 nga 42, vetëm 35%.

Bilanci i Contes kundër Guardiolës

Megjithatë, bilanci “kokë më kokë” mes Contes dhe Guardiolës është në favor të italianit, i cili e ka mposhtur spanjollin katër herë në shtatë përballje, duke humbur tri herë.

Siç raporton TMW, vetëm Luis Enrique ka një bilanc më të mirë kundër Guardiolës, me tre fitore dhe dy humbje, duke marrë parasysh trajnerët që janë përballur të paktën pesë herë me trajnerin e Manchester City. /GazetaExpress/