Lidhja Demokratike e Kosovës nuk heq dorë nga pozita e presidentit në negociatat me Lëvizjen Vetëvendosje. Përkundër presionit publik dhe mundësisë që kjo pozitë të bëhet shkaktar për dështim të koalicionit, posti i të parit të shtetit konsiderohet balancim i pushtetit mes dy partive.
Por pavarësisht kësaj, zyrtari i LDK-së shprehet optimist se do gjinden modalitete dhe marrëveshja me VV-në do të ndodhë.
Anëtari i kryesisë së LDK-së, Avdullah Hoti në një intervistë për KosovaPress, thotë se janë në pritje të ftesës së VV-së për takimin e ardhshëm, teksa i mohon në mënyrë kategorike se janë ndarë ministritë mes tyre dhe Vetëvendosjes.
Deputeti i zgjedhur i LDK-së po ashtu i bën thirrje Vetëvendosjes se nëse posti i kryeparlamentarit, presidentit dhe gjysmës së qeverisë peshon më shumë, mund të i ndërrojnë pozitat dhe partia e tyre të merr kryeministrin dhe gjysmën e qeverisë.
Edhe pse sot u raportua se ministritë mes VV-së dhe LDK-së janë ndarë, Hoti thotë se ende nuk janë përmbyllur çështjet e ndarjes së përgjegjësive. Teksa thekson se nëse nuk ka pajtim të plotë, nuk ka pajtim për asgjë.
Megjithëse ka mospajtime për këto çështje, Hoti thotë se nuk ka asnjë arsye që koalicioni mos të ndodhë përderisa ka korrektësi.
E hëna e kësaj jave ka qenë takimi i fundit mes dy liderëve Kurti-Mustafa, ku u shpërfaqën disa dallime kryesisht në ndarjen e ministrive dhe çështjen e presidentit.
