Zlatan Ibrahimovići do të kujtohet si një nga futbollistët më karizmatikë dhe të paparashikueshëm që ka luajtur ndonjëherë, dhe karriera e tij ishte e mbushur me përplasje të paharrueshme.

Qoftë duke e quajtur veten “zot”, “luani”, “i pavdekshëm”, apo duke shënuar disa nga golat më të bukur në historinë e futbollit, Ibrahimović gjithmonë dinte të ishte në qendër të vëmendjes.

Ai do të mbahet mend si një nga sulmuesit më të mëdhenj të brezit të tij, duke fituar trofe pothuajse në çdo klub ku ka luajtur, por jo gjithçka ka qenë perfekte.

Personaliteti i tij i fortë ishte i destinuar të krijonte tensione, sidomos me ish-shokun e tij tek Ajax, Rafael van der Vaart.

Pas fitimit të Ligës së Kampionëve më 1995, klubi holandez po ndërtonte një skuadër të re të mbushur me yje si Wesley Sneijder, Ryan Babel dhe Nigel de Jong, me Ronald Koeman në stol.

Ibrahimović, i transferuar nga Malmö FF në vitin 2001, u bë shpejt figura kryesore e ekipit, por nuk kishte marrëdhënie të mirë me kapitenin e ri, Van der Vaart.

Van der Vaart tha: “Në atë kohë ishim të dy të rinj dhe unë isha lojtari më i mirë te Ajax. Ai erdhi dhe mendonte se ishte më i miri. Mendoj se ishte pak xheloz.”

Megjithatë, pavarësisht tensioneve, ata luajtën 68 ndeshje së bashku, duke fituar dy tituj kampionë dhe Kupën e Holandës (KNVB Cup).

Katër vite pas ardhjes së Ibrahimovićit në Holandë, ai u përball me Van der Vaart në një miqësore mes Suedisë dhe Ajaxit. Van der Vaart u dëmtua pas vetëm shtatë minutash nga një ndërhyrje e Ibrahimović.

Më vonë, holandezi citoi Ibrahimović duke thënë:

“Nuk më pëlqen, nuk më pëlqen si kapiten. Nuk të kam dëmtuar me qëllim… Nëse më akuzon prapë, do t’i thyej të dy këmbët, dhe këtë herë me qëllim.”

Në një intervistë për “talkSPORT”, Van der Vaart shtoi: “Ai ishte arrogant. Kishim përplasje të mëdha. Të dy kishim ego të mëdha dhe ishim të rinj.”

Pas incidentit, tensionet u rritën në ekip, dhe situata arriti deri aty sa njëri prej tyre duhej të largohej. Në fund, Ibrahimovići u transferua te Juventus.

Van der Vaart qëndroi tek Ajax edhe një vit përpara se të transferohej te Hamburger SV.

Duke reflektuar mbi rivalitetin e tyre, ai pranoi se Ibrahimović e kishte bërë vërtet kërcënimin, por shtoi se sot nuk do të kishin probleme nëse do të takoheshin rastësisht.

“Do të preferoja të isha në një ekip me njerëz të sinqertë si ai, edhe nëse ka debate. Thjesht nuk shkonim mirë bashkë,” përfundoi ai./GazetaExpress/