Ciro Immobile i pandalshëm drejt rekordit të golave në Serinë A.
Pas 25 javëve në Serinë A, falë golit të shënuar në fitoren 2-3 të Lazios në fushën e Genoas, “Mbreti Ciro” ka arritur kuotën e 27 golave në kampionat.
Një shifër e jashtëzakonshme që ka lejuar “bomberin” bardhekaltër të barazojë rekordin e Antonio Angelillon në sezonin e largët 1958-1959 (27 gola në 25 javët e para).
Cristiano Ronaldo mbetet i dyti me 6 gola më pak. Immobiles i duhen edhe 9 gola deri në fund të sezonit për të barazuar rekordin e El Pipita Higuain, që ka shënuar 36 gola brenda një sezoni në Serinë A.
Deri në fund të kampionatit janë për t’u luajtur edhe 13 ndeshje dhe rekordi i Higuainit duket krejtësisht i arritshëm madje i kapërcyeshëm nga Immobile.
Që nga sezoni 2016-2017, Immobile ka mundur të shënojë plot 94 gola me fanellën e Lazios. Statstikë kjo që e rendit sulmuesin bardhekaltër vetëm pas Lionel Messit (125 gola) dhe Robert Lewandowskit (106 gola).
