India dhe SHBA-të kanë shtyrë bisedimet tregtare, të cilat ishin planifikuar të zhvilloheshin këtë javë, ndërsa “studiojnë implikimet” e Gjykatës Supreme të SHBA-së, që rrëzoi tarifat globale të administratës Donald Trump, tha një zyrtar i ministrisë indiane të tregtisë për BBC-në.

Një delegacion indian do të udhëtonte për në Uashington këtë javë për të finalizuar kushtet e një marrëveshjeje të përkohshme tregtare e cila u njoftua në fillim të këtij muaji.

Marrëveshja uli tarifat amerikane për mallrat indiane nga 50% në 18%, edhe pse disa aspekte të saj mbetën të paqarta.

Vendimi i Gjykatës së Lartë ka çuar në pasiguri të reja, pasi Trump tha se do të vendoste tarifa globale prej 15% për të gjitha mallrat që hyjnë në SHBA.

Nuk është ende e qartë se çfarë domethënie kanë vendimi i gjykatës dhe tarifat e reja për marrëveshjet ekzistuese tregtare midis SHBA-së dhe vendeve të tjera.

Zhvillimet e reja vijnë pas disa muajsh kaotikë për eksportuesit indianë, të cilët janë përballur me tarifat prej 50% të vendosura nga Trump, të cilat hynë në fuqi më 27 gusht. Detyrimet përfshinin një penalizim për blerjen e naftës ruse, të cilën Trump e kishte kritikuar prej kohësh.

Më 2 shkurt, Trump njoftoi se të dy vendet kishin arritur një marrëveshje të përkohshme tregtare pas një telefonate me kryeministrin Narendra Modi, duke sjellë lehtësim në tregjet indiane.

Çfarë nuk dimë ende për marrëveshjen tregtare SHBA-Indi

Sipas BBC, India premtoi të ulte tarifat e saj standarde për të gjitha mallrat industriale amerikane, si dhe për disa produkte ushqimore dhe bujqësore, ndërsa SHBA-të ranë dakord të ulnin tarifat reciproke që zbatohen për rreth 55% të eksporteve indiane, duke i ulur ato nga 50% në 18%.

Por njoftimi shkaktoi disa pyetje ende të pazgjidhura nëse India po jepte më shumë nga sa po merrte, nëse Delhi u zotua apo jo të ndalonte blerjet e naftës ruse dhe nëse India mund të blinte mallra amerikane me vlerë 500 miliardë dollarë gjatë pesë viteve.

Kjo gjë i mërziti gjithashtu sindikatat e fermerëve të Indisë, të cilat paralajmëruan se uljet e tarifave për importet bujqësore të SHBA-së mund të dëmtojnë prodhuesit vendas. Ministri i Tregtisë i Indisë, Piyush Goyal, ka thënë se vendi nuk ka ofruar lëshime për produktet e qumështit, produktet e modifikuara gjenetikisht, mishin apo shpendët, dhe se janë vendosur masa mbrojtëse për fermerët.

Por analistët ende presin sqarime mbi kushtet e marrëveshjes dhe për çfarë saktësisht ka rënë dakord Delhi.

Javën e kaluar, Goyal tha se marrëveshja mund të hyjë në fuqi në prill, pasi çështjet e pazgjidhura të adresoheshin gjatë vizitës së delegacionit në Uashington.

Kjo tani është komplikuar nga vendimi i së premtes i Gjykatës Supreme të SHBA-së se Trump tejkaloi autoritetin e tij duke përdorur Aktin Ndërkombëtar të Fuqive Ekonomike të Emergjencës të vitit 1977 për të vendosur tarifa globale gjithëpërfshirëse. Kjo erdhi si një goditje e madhe për axhendën e mandatit të dytë të presidentit amerikan.

Pasiguritë u thelluan gjatë fundjavës pasi Trump njoftoi se do të rriste tarifat globale në 15% , maksimumi i lejuar sipas një ligji tregtar të papërdorur kurrë.

“Të dyja palët [India dhe SHBA-ja] kanë vendosur të shtyjnë bisedimet derisa të dyja palët të jenë në gjendje të studiojnë implikimet e zhvillimeve të fundit”, tha zyrtari në ministrinë e tregtisë së Indisë për BBC-në.

Kurse “Reuters” raportoi, duke cituar një burim të paidentifikuar, se ende nuk është caktuar një datë e re për vizitën e delegacionit, i cili ishte planifikuar të nisej të dielën.