Raportimet e së martës thonë se skuadra e sapo-promovuar në Premier League, Sunderland, ka arritur një marrëveshje me mesfushorin e Bayer Leverkusenit, Granit Xhaka – një goditje për Interin dhe Milanin, që sipas mediave italiane kishin qenë duke shqyrtuar mundësinë e transferimit të ish-yllit të Arsenalit.

Sipas gazetarit David Ornstein nga “The Athletic”, Xhaka i ka njoftuar drejtuesit e Leverkusenit se dëshiron vetëm kalimin te Sunderland këtë verë, dhe tashmë ekziston një marrëveshje mes lojtarit dhe klubit anglez.

Ende nuk ka një marrëveshje përfundimtare mes klubeve, por lojtari thuhet se i ka kërkuar Leverkusenit të gjejë një “zgjidhje” me Sunderlandin sa më shpejt të jetë e mundur.

Këtë e ka konfirmuar edhe vetë agjenti i lojtarit, Jose Noguera, i cili për “Sky Sport” ka thënë se kanë arritur marrëveshje në kushte personale me Sunderlandin.

“Kemi arritur një marrëveshje të plotë me Sunderland. Graniti dëshiron të rikthehet në Premier League dhe Sunderland është shumë i entuziazmuar për të: ai synon ta pranojë këtë sfidë. Shpresojmë që Leverkusen të respektojë dëshirën e tij për t’u larguar dhe që klubet të gjejnë një marrëveshje sa më shpejt”, ka thënë agjenti i tij.

Xhaka është ende nën kontratë me Leverkusenin deri në verën e vitit 2028, por po kërkon largimin nga “BayArena”, pasi e konsideron si fund të një epoke largimin e trajnerit Xabi Alonso dhe yjeve Florian Wirtz e Jeremie Frimpong.

Raportimet në Itali më herët këtë verë e kishin përmendur Milanin si destinacion të mundshëm për Xhakën, por “Kuqezinjtë” tashmë janë fokusuar te Luka Modric dhe Samuele Ricci dhe nuk pritet të rikthehen në bisedime për mesfushorin zviceran.

Gjithashtu, “La Gazzetta dello Sport” raportoi gjatë fundjavës se Interi do ta kishte prioritet Xhakën në rast se Hakan Çalhanoğlu largohej gjatë kësaj merkatoje – një skenar që tani duket i pamundur për shkak të marrëveshjes me Sunderlandin.

Gjithashtu pati raportime të shkurtra se edhe Juventusi ishte ndër klubet italiane të interesuara për të arritur një marrëveshje me reprezentuesin e Zvicrës këtë verë./GazetaExpress/