Interi është shpallur zyrtarisht “Kampion i vjeshtës” në Serie A, duke e mbyllur gjysmën e parë të sezonit në krye të renditjes pas 20 javësh kampionat.

Skuadra e drejtuar nga Cristian Chivu ka grumbulluar 46 pikë, duke konfirmuar formën e shkëlqyer dhe ambiciet serioze për titull, shkruan “Tuttomercatoweb”, përcjell “Gazeta Express”.

Sipas statistikave, Interi i Chivu ka bërë më mirë se Napoli i Antonio Contes, i cili sezonin e kaluar u shpall kampion i Italisë, por pas 20 javësh kishte vetëm 40 pikë.

Ky fakt tregon se zikaltërit janë në një ritëm edhe më të lartë se kampioni në fuqi i Serie A.

Në historinë e klubit, vetëm dy trajnerë kanë pasur një bilanc më të mirë se Chivu pas 20 javësh:

Simone Inzaghi (2023/24) me 51 pikë

Antonio Conte (2019/20) me 47 pikë

Titulli “Kampion Vjeshte” nuk sjell trofe zyrtar, por shpesh shihet si një sinjal i fortë për skuadrën që e synon “Scudetton”.

Interi, me stabilitet, rezultate dhe vazhdimësi, po konfirmohet si një nga favoritët kryesorë për titullin kampion këtë sezon.

Me këtë ecuri, pritshmëritë rreth projektit të Cristian Chivu po rriten ndjeshëm, ndërsa tifozët zikaltër shpresojnë që ky ritëm të vazhdojë edhe në gjysmën e dytë të sezonit. /Gazeta Express