Interi po përgatit një ofertë të re për sulmuesin e Atalantës, Ademola Lookman, raportojnë mediat italiane, me zikaltrit që janë gati ta rrisin ofertën deri në 45 milionë euro, duke përfshirë edhe bonuset.

Sipas asaj që ka raportuar Corriere dello Sport, përmes Inter-News.it, skuadra e drejtuar nga Cristian Chivu është e gatshme të shtojë 5 milionë euro në ofertën fillestare prej 40 milionë eurosh, e cila thuhet se u dorëzua më herët gjatë kësaj jave.

Kjo mbetet ende nën çmimin prej 50 milionë eurosh që ka vendosur La Dea për sulmuesin nigerian, por të dyja palët po i afrohen gjithnjë e më shumë një marrëveshjeje, edhe pse klubi nga Bergamo duket i vendosur të mos heqë dorë nga kërkesat e tij.

Raportet nga Corriere sugjerojnë se zikaltrit do t’ia paraqesin Atalantës ofertën e përmirësuar në fillim të javës së ardhshme dhe se do të bëhet fjalë për një blerje përfundimtare – dhe jo për huazim me detyrim blerjeje, siç është përmendur nga disa media.

Thuhet gjithashtu se Interi e ka në anën e tij vullnetin e lojtarit, pasi Lookman është i etur të përfundojë transferimin te finalistët e Ligës së Kampionëve. Klubi mund ta përdorë këtë faktor si avantazh në negociatat me Atalantën./GazetaExpress/