Irani goditi një bazë ushtarake që strehon trupa britanike, amerikane dhe australiane në Emiratet e Bashkuara Arabe gjatë sulmeve të natës në të gjithë Gjirin.

Një raketë goditi Bazën Ajrore Al Minhad, ku Mbretëria e Bashkuar mban një strukturë të përhershme ushtarake. Predha shkaktoi dëme të vogla në një bllok akomodimesh dhe një strukturë mjekësore, bëri me dije Anthony Albanese, kryeministri australian.

Baza, e operuar nga Emiratet e Bashkuara Arabe, shërben si selia ushtarake e Australisë për Lindjen e Mesme dhe ka pritur forcat e saj që nga viti 2003. Kryeministri Albanese konfirmoi se i gjithë stafi australian ishte “absolutisht i sigurt”.

Mbretëria e Bashkuar hapi një seli të përhershme në bazë në vitin 2024 për të mbështetur operacionet britanike në rajon. Baza u godit nga një sulm me dron iranian në ditët e para të luftës, por nuk u raportuan dëme.

Irani nisi një bombardim me dronë dhe raketa drejt Izraelit dhe shteteve të Gjirit gjatë natës, duke vrarë një çift të moshuar në Tel Aviv. Zyrtarët iranianë u zotuan për hakmarrje për vrasjen e Ali Larijani, shefit më të lartë të sigurisë, i cili vdiq në një sulm ajror izraelit të hënën.