Skender Llaloshi, ish-drejtori i shkollës “Gjergj Fishta” në Prishtinë, po pretendon se i është bërë e padrejtë në konkursin për drejtor të kësaj shkolle. Ai thotë se nuk u rizgjodh në krye të shkollës, ani pse thotë se i plotësonte te gjitha kushtet. Madje ka treguar se si edhe kryetari i komunës, Shpend Ahmeti, e kishte lavdëruar për punën që kishte bërë në shkollë derisa ishte drejtor

Llaloshi thotë se pas mbarimit të mandatit të tij, ishte mbajtur kundërligjshëm si ushtrues detyre, pasi komuna nuk kishte hapur konkurs.

“Mbi bazën e një udhëzimi Administrativ në fuqi, ku kryetarit të komunës i jepet e drejta për t'u vazhduar mandatin  "drejtorëve të suksesshëm", Drejtori i atëhershëm i Arsimit, z. Jonuz Salihaj, më ka garantuar se unë jam  në listë i propozuar për të ma vazhduar mandatin mbi bazë të performancës duke qenë shkolla me gjendjen më të mirë vitet e fundit, si dhe drejtori ndër më të përgatiturit profesionalisht, ndërkohë jam eliminuar nga lista dhe janë zgjedhur 4 drejtorë tjerë”, është shprehur Llaloshi për Express.

Ai ka thënë se kriteret e kësaj përzgjedhjeje nuk janë bërë kurrë publike.

“Madje, zyrtarë nga Sektori i Burimeve Njerëzore brenda konmunës janë shprehur se gjatë përzgjedhes ka pasur shumë interferime nga jashtë....dhe kjo po i bie përzgjedhje sipas "dostave" apo ndonjë pazari tjetër”, është shprehur ai.

Llalloshi thotë se për 5 vjet e 8 muaj sa ishte drejtor, në bashkëpunim me arsimtarët e shkollës, kishin eliminuar dhunën në shkollë, kishin arritur t’i largojnë substancat narkotike si dhe kishin kthyer rendin në shkollë.

Ai thotë se për këtë, edhe kryetari Ahmeti e kishte përmendur shkollën “Gjergj Fishta” në një emision televiziv, si ndër shkollat më të mira të kryeqytetit.

“Një temë që nuk është diskutuar mjaftueshëm në zgjedhje është siguria e fëmijëve nëpër shkolla. Sot si një prind, brenda ime më e madhe është kur vajza ime shkon në shkollë, a po shkon në një ambient të sigurt apo jo. Kemi shembuj shumë të mirë, sikurse është në shkollën “Gjergj Fishta”, ku siguria në shkollë mendoj se funksionon më së miri”, kishte thënë Ahmeti në një emision televiziv në tetor të vitit 2017.

Llaloshi thotë se në intervistën për drejtor të shkollës ku kishte edhe kandidatë të tjerë, atij i ishte thënë se kishte pasur rezultatin më të mirë.

Llaloshi thotë se në konkursin për drejtor të shkollave në shtator të vitit 2018, kishte treguar rezultat të mirë në intervistë. Por ai thotë se i është bërë e padrejtë në këtë konkurs.

“Me rastin e thirrjes në intervistë, jam paraqitur bashkë me dy kundërkandidatë të tjerë. Kemi hyrë në intervistë dhe kam dalur më i miri nga të dy konkurrentët (madje njerëz të cilët ishin prezent në intervistë, thonë se: "Ke qenë më i miri nga të gjithë kandidatët e të gjitha shkollave"”, është shprehur ai.

Llalloshi thotë se pas 28 vjetësh përvojë pune në arsim, kishte mbetur i papunë për 3 muaj.

Ai po ashtu thotë se ka kërkuar takim me kryetarin Ahmeti, por që për më shumë se 20 muaj ka qenë e pamundur të takohet me të.

“Pas 28 vjetësh përvojë, këta më lanë në rrugë 3 muaj ditë pa punë, me performancë të shkëlqyeshme, me përgatitje përofesionale Master i Udhëheqjes në Arsim, pa bërë asnjë skandal, pa shkel ligjin, pa vjedh, pa munguar nga puna pa kurrfarë afere! Për këtë diskriminim, ka plot 10 muaj që kërkoj takim me kryetarin e komunës, i kam shkruar në e-mail zyrtare, i kam dërguar kopje fizike të letrës, i kam shkruar mesazh, por kabineti i tij për mua mbetet i barrikaduar”, shprehet Llaloshi.

Express ka kontaktuar edhe zyrën për media të Komunës së Prishtinës, por të njëjtit kanë thënë se nuk kanë përgjigje lidhur me këtë rast dhe se Llalloshi duhet të ankohet në Komunë, e jo në media.