Ish-kampioni i UFC Francis Ngannou ka folur publikisht për aksidentin fatal me motor në të cilin ishte i përfshirë.

Muajin e kaluar, u raportua në Kamerun se ish-ylli i UFC-së po ngiste një motor që përplasi dhe vrau një vajzë të re në distriktin Yaoundé. Sipas raportimeve, Ngannou e ndihmoi 17-vjeçaren të dërgohej në spital dhe ofroi mbështetje financiare gjatë trajtimit mjekësor. Megjithatë, vajza nuk arriti të mbijetonte për shkak të plagëve të marra.

Mësohet se aksidenti ndodhi gjatë fundjavës së Pashkëve, dhe sipas burimeve lokale të cituara nga Daily Mail, viktima është identifikuar si Ntsama Brigitte Manuella.

Së fundmi, Ngannou ka dhënë një deklaratë zyrtare për TMZ Sports, ku tha:

“Që nga fillimi, kam qenë pranë familjes, duke ofruar mbështetje, ngushëllime dhe ngrohtësi gjatë kësaj kohe. Jam takuar privatisht me ta për të ndarë dhimbjen dhe do të vazhdoj të jem pranë tyre në çdo hap.”

Ngannou shtoi se nuk mund të japë më shumë detaje, pasi hetimet për ngjarjen janë ende në vazhdim. Ai tha:

“E mbaj dhimbjen e tyre me vete dhe mendimet e mia të palëkundura dhe mbështetja ime mbeten me ta ndërsa përballen me këtë humbje shkatërruese.”

38-vjeçari Ngannou luftoi për herë të fundit në tetor 2024, kur debutoi në Professional Fighters League (PFL), duke fituar me nokaut në raundin e parë kundër kampionit të PFL 2023 Renan Ferreira.

Që nga largimi nga UFC, Ngannou ka sfiduar edhe emra të mëdhenj në boks si Tyson Fury dhe Anthony Joshua. Në prill 2024, ai përjetoi një humbje personale tragjike, kur zbuloi vdekjen e papritur të djalit të tij 15-muajsh, Kobe./GazetaExpress/