Ish-anësori i Juventusit, Massimo Mauro, pranon se Kenan Yildiz mund të ndjekë hapat e Alessandro Del Pieros, por thekson se ende ka “një rrugë të gjatë për të bërë” për të arritur nivelin e Michel Platinit.
Ylli i Juventusit, Yildiz, ka dhënë një kontribut të madh në rezultatet e fundit që panë bardhezinjtë të sigurojnë gjashtë fitore në shtatë ndeshjet e fundit në të gjitha kompeticionet.
Reprezentuesi i Turqisë ka qenë një lojtar kyç si nën drejtimin e Igor Tudor ashtu edhe të Luciano Spallettit, duke fituar gjithnjë e më shumë krahasime me legjendën e Juventusit, Del Piero.
“Mund të krahasohet me Del Pieron për nga karakteristikat, duke pasur parasysh se në një moment të caktuar Alex luante më shumë si sulmues,” tha ish-anësori i Juventusit, Mauro, për Gazzetta.
“Për nga ndërtimi fizik dhe aftësitë, ai mund ta imitojë me siguri, por Yildiz nuk ka lidhje me Platinin. Në këtë rast, ende ka shumë rrugë për të bërë.”
Mauro ka luajtur me Platinin te Juventusi dhe ka fituar një titull të Serie A dhe një Kupë Interkontinentale gjatë kohës së tij në Torino.
Kontrata e Yildiz skadon në qershor të vitit 2029, por Juventusi tashmë po punon për ta zgjatur qëndrimin e tij në klub.
“Comolli ka përvojën e nevojshme për të vepruar në interesin më të mirë të Juventusit. Ose e shet për 200 milionë, ose i rinovon kontratën. Është e qartë se të gjithë presin që ai ta mbajë Yildiz,” argumentoi Mauro.
Dusan Vlahovic ishte sulmuesi titullar i Juventusit para se të dëmtohej në nëntor. Meqë serbi do të qëndrojë jashtë fushave deri në mars, tani Lois Openda dhe Jonathan David konkurrojnë për një vend titullar në repartin ofensiv.
“Kur vjen te Juventusi dhe nuk ke dikë pranë që të zgjidh problemet, gjithçka bëhet më e vështirë. David ka disa karakteristika që mund t’i sjellë në zonë dhe, gjatë sezonit, mund të jetë shumë i dobishëm,” tha Mauro.
“Openda ka karakteristika të ndryshme; nëse ka hapësira, siç ndodhi kundër Romës, ai mund të japë vërtet një ndihmë të madhe. Personalisht, e konsideroj shumë inteligjent, edhe për mënyrën se si di të krijojë hapësira në momentet e duhura.”/GazetaExpress/
