Real Madridi ka pranuar se ka një problem me Vinicius Juniorin, pas fitores së fundjavës ndaj Sevillas.

Anësori u fishkëllye nga tifozët në “Bernabeu” teksa u zëvendësua, pas një tjetër paraqitjeje nën nivel, gjë që ka ngritur shqetësime për të ardhmen e tij afatgjatë në kryeqytetin spanjoll.

Situata me Vinicius Juniorin ka qenë e tensionuar prej kohësh, që nga momenti kur përfaqësuesit e tij dhe Real Madridi hynë në bisedime për rinovimin e kontratës.

Deri më tani nuk është arritur asnjë marrëveshje, pasi klubi nuk është i gatshëm të përmbushë kërkesat që janë paraqitur.

Sipas “Cadena SER” (përmes “Marca”), ish-lojtari i Real Madridit, Pedja Mijatovic, i ka thënë klubit të tij të mëparshëm të mos dorëzohet ndaj kërkesave të Viniciusit dhe përfaqësuesve të tij.

Nëse nuk arrihet marrëveshje, ai do të dëshironte që braziliani të shitet verën e ardhshme.

“Real Madridi duhet të jetë gjithmonë mbi çdo lojtar, mbi çdo figurë futbollistike, sepse është klubi më i madh në botë. Nëse Vinicius mbyllet ndaj rinovimit, Real Madridi duhet të bëjë gjithçka të mundur për ta shitur. Në asnjë rrethanë nuk mund të lejoni që një lojtar apo përfaqësuesit e tij t’ju menaxhojnë. Nëse Vinicius tani po kërkon kontratën e Mbappés apo të Messit, kjo do të thotë se ai nuk dëshiron të rinovojë. Është e qartë, nuk jemi fëmijë. Dhe nëse ai dëshiron ta përfundojë kontratën, nuk ka problem, Real Madridi duhet të jetë gjithmonë mbi të gjithë”, tha ai.

Është e qartë se Viniciusi po e ka të vështirë të rikthejë nivelin që tregoi gjatë sezonit 2023/24, kur ishte shumë pranë fitimit të Topit të Artë.

Në këtë drejtim nevojitet një zgjidhje, pasi Real Madridi nuk mund të përballojë që ai të vazhdojë të luajë në këtë formë – sidomos nëse synon të jetë lojtari më i paguar i klubit, krah Mbappés./GazetaExpress/