Italia mund të detyrohet sërish të marrë pjesë në një ndeshje play-off ndërsa kërkon të kualifikohet për Kupën e Botës 2026.

“Azzurrët” aktualisht ndodhen në vendin e dytë në Grupin I, gjashtë pikë prapa kryesueses Norvegjisë, megjithëse me një ndeshje më pak të zhvilluar. Vetëm skuadra e parë e çdo grupi kualifikohet automatikisht dhe fitorja dërrmuese e Norvegjisë 11-1 ndaj Moldavisë do të thotë se ata kanë një epërsi të konsiderueshme në golaverazh.

Italia duhet të shpresojë që Norvegjia të humbasë pikë përpara përballjes direkte në nëntor, përndryshe, edhe këtë herë Azzurrët do të përjetojnë dramën e play-off-it.

Megjithatë, ndërsa Italia shikon mundësinë e një play-off-i, pavarësisht se ka humbur vetëm një herë në katër ndeshjet e para, shihet qartë pabarazia mes mënyrës si funksionojnë gjërat në Europë dhe asaj në Amerikën e Jugut, ku Brazili është kualifikuar automatikisht për turneun e vitit të ardhshëm megjithëse fitoi vetëm tetë dhe humbi gjashtë nga 18 ndeshjet.

Europa më e vështirë për t’u kualifikuar, Italia përgatitet për play-off

Siç ka theksuar gazetari italian Giovanni Capuano në X, sistemi i kualifikimeve për Kupën e Botës ka nevojë për përmirësim.

Në kualifikimet e Amerikës së Jugut (CONMEBOL), gjashtë nga dhjetë skuadra kualifikohen automatikisht, ndërsa një tjetër shkon në play-off.

Capuano ka llogaritur se një skuadër e Amerikës së Jugut mund të kualifikohet për Kupën e Botës me mesatare prej vetëm 1.16 pikësh për ndeshje. Ndërkohë, një skuadër europiane me të njëjtën mesatare nuk do të ishte as pranë një vendi në play-off, e lëre më për kualifikim direkt.

Gjithashtu, gazetari thekson se 8 nga 10 skuadrat më të mira në renditjen e FIFA-s janë nga Europa, ndërsa 15 të tilla gjenden në Top 30.

Prandaj, edhe pse Italia mund të kritikohet me të drejtë nëse dështon të kualifikohet për një turne madhor, nuk është aspak e lehtë për skuadrat europiane të sigurojnë vendin e tyre në fazën finale, sidomos në krahasim me sa më e thjeshtë mund të jetë kjo për kombëtaret e tjera të mëdha në botë. /GazetaExpress/