Israel Katz, ministri i Mbrojtjes i Izrael, të shtunën paralajmëroi presidentin e Libanit, Joseph Aoun, se Libani do të “paguajë çmimin” nëse nuk e çarmatos Hezbollah, milicinë e mbështetur nga Irani që dominon jugun e vendit.

Në një deklaratë televizive drejtuar presidentit, Katz tha se Libani kishte “bërë një premtim dhe një zotim për të zbatuar marrëveshjen dhe për të çarmatosur Hezbollahun – por këto gjëra nuk po ndodhin”.

“Nëse duhet të zgjedhim mes mbrojtjes së civilëve dhe ushtarëve tanë ose shtetit të Libanit, ata që do të paguajnë çmimin do të jenë qeveria libaneze dhe i gjithë Libani”, tha Katz, shkruan CNN, transmeton Gazeta Express.

Pasi Joseph Aoun u zgjodh president në janar të vitit 2025, ai u zotua të rikthente monopolin e ushtrisë libaneze mbi armët në vend duke çarmatosur Hezbollah. Por grupi militant ka vazhduar të operojë dhe javën e kaluar kreu një sulm ndaj Izraelit pas goditjeve të përbashkëta të Shtetet e Bashkuara dhe Izraelit ndaj Iranit.

Izraeli është përgjigjur me një ofensivë të ashpër në të gjithë Libanin, duke goditur Hezbollahun jo vetëm në jug, por edhe në kryeqytetin Beirut dhe në Tripoli në veriun e largët. I pyetur së fundmi nëse Izraeli po përgatit një pushtim tokësor në shkallë të gjerë, një zëdhënës i ushtrisë izraelite tha: “Të gjitha opsionet mbeten në tryezë.”

Katz tha se Izraeli nuk ka “asnjë pretendim territorial” në Liban, “por nuk do të pranojmë që nga territori libanez të rifillojnë sulmet me raketa drejt Izraelit".

“Prandaj po ju drejtohemi dhe po ju paralajmërojmë – bëni diçka dhe veproni para se ne të bëjmë edhe më shumë", tha Katz në mesazhin e tij drejtuar Aoun.