Në fundjavë u raportua gjerësisht se Barcelona ka arritur marrëveshje për të nënshkruar me Marcus Rashford nga Manchester United. Sulmuesi 27-vjeçar do të transferohet në Katalonjë në formë huazimi për një sezon, me një opsion blerjeje që besohet të jetë në vlerën prej 30-35 milionë euro.

Rashford do të jetë përforcimi i shumëkërkuar për krahun e majtë të sulmit, pasi Barça më herët kishte synuar të transferonte Nico Williams dhe Luis Díaz. Ai pritet të mbërrijë në Katalonjë brenda pak orësh, ku do të kryejë vizitat mjekësore dhe do të nënshkruajë dokumentacionin përkatës në ditët në vijim – dhe nëse gjithçka ecën sipas planit, do të përfshihet në skuadrën e Hansi Flick për turneun parasezonal në Japoni dhe Korenë e Jugut.

Ka entuziazëm mes tifozëve të Barcelonës për ardhjen e Rashford, dhe një detaj që po pritet me kuriozitet është numri i fanellës që do të mbajë te kampionët e La Ligës. Sipas “Mundo Deportivo”, ai ka tre opsione: 14, 19 dhe 22 – pasi lojtarët e regjistruar në ekipin e parë mund të zgjedhin vetëm nga numrat 1 deri në 25.

Pritet që Rashford të zgjedhë numrin 14 ose 19, për shkak të domethënies së tyre. Numri 14 është veshur nga legjendari Johan Cruyff, si dhe nga Thierry Henry, një nga idhujt e Rashford-it. Ndërsa 19-ta është një numër që ai e ka mbajtur në fillimet e tij te Manchester United – konkretisht për dy sezone, nga 2016 deri në 2018. Ky numër më herët i përkiste Lamine Yamal, i cili këtë javë mori fanellën me numrin 10 pas largimit të Ansu Fati-t drejt AS Monacos.

Përveç nëse ndodh ndonjë e papritur, së shpejti do të mësohet se cilin numër do të zgjedhë Rashford. Do të jetë interesante të shihet si do të përshtatet ai te Barcelona, me shumë ekspertë që parashikojnë se do të jetë një aset i vlefshëm për Flick, i cili tashmë ka një repart sulmues shumë të rrezikshëm përpara fillimit të sezonit të ri muajin e ardhshëm./GazetaExpress/