Java e tretë në Superligën e Kosovës në futboll nis sot me katër përballje që nisin në orën e njëjtë, nga 16:30.
Vetëm ndeshja Llapi – Drita do të luhet nesër (e hënë) në të njëjtin orar, shkruan Gazeta Express.
Prishtina që ka dy fitore nga dy ndeshjet e para do të udhëtojë për t’u përballur me Gjilanin që nuk e ka nisur aspak mirë sezonin me një humbje dhe një barazim.
Ferizaj që ka po ashtu dy fitore do të jetë nikoqir i Ballkanit, teksa Dukagjini udhëton për t’u ndeshur me Malishevën në “Liman Gegaj”.
Duel interesant pritet të jetë edhe ai mes dy ekipeve që janë inkuadruar këtë sezon në Superligë, Drenicës dhe Prishtinës së Re që luhet në stadiumin “Bajram Aliu” në Skënderaj.
