Anëtarë të familjes së heroit kombëtar Adem Jashari kanë mohuar se kanë ndonjë interes për të garuar për postin e presidentit të Kosovës, pavarësisht deklaratave se një emër nga kjo familje do të siguronte “konsensus automatik” në skenën politike.

Murat Jashari ka theksuar se familja Jashari i përket gjithë shqiptarëve dhe nuk duhet të përfshihet në kalkulime të zakonshme politike. Sipas tij, një përgjegjësi e tillë do të mund të merrej parasysh vetëm në rrethana të jashtëzakonshme, si në rast të ndonjë rreziku të madh kombëtar, por jo në kushte normale politike.

Ai ka theksuar se mbi supet e tij rëndon një barrë e madhe morale dhe historike, duke shtuar se nuk dëshiron që emri i familjes Jashari të përdoret për interesa politike.

Qëndrim të njëjtë ka mbajtur edhe Bekim Jashari, i cili ka deklaruar se pajtohet plotësisht me këtë vendim dhe se nuk ka asgjë për t’i shtuar.

Refuzimi i qartë nga dy figura të njohura të familjes Jashari vjen në një moment kur Kosovës i duhet të zgjedhë presidentin e ri brenda një afati të ngushtë kohor, për të shmangur zgjedhjet e reja të parakohshme.

Në këtë kontekst, shtrohet pyetja kryesore: a ka kryeministri Albin Kurti një plan të dytë për zgjedhjen e presidentit?

Me afrimin e afatit kushtetues, mbetet të shihet nëse Kurti dhe shumica parlamentare do të arrijnë të nxjerrin një kandidat të pranueshëm për të gjitha palët, apo vendi do të shkojë drejt një tjetër krize politike dhe zgjedhjeve të reja.