Ylli i Real Madridit, Jude Bellingham, ka dhënë sinjale të forta para përballjes së madhe të së dielës ndaj Barcelonës, duke deklaruar se është “në gjendjen më të mirë fizike prej një kohe të gjatë” dhe gati të bëjë diferencën sërish në El Clásico.

Anglezi 22-vjeçar, i cili u rikthye së fundmi pas një operacioni në shpatull gjatë verës, është përfshirë në formacionin startues të Carlo Ancelottit për ndeshjen që pritet të zhvillohet në një atmosferë elektrizuese në “Santiago Bernabéu”.

“Është e pabesueshme. Për një futbollist nuk ka skenë më të mirë se kjo për një ndeshje të madhe. E kam përjetuar disa herë, por nuk të bëhet kurrë zakon. Sa herë që shkel në fushë, ndien emocionin — tifozët, pankartat, brohoritjet… e di që të pret një natë e madhe. Shpresoj që ta shpërblejmë gjithë energjinë që na japin tifozët", tha Bellingham për RMTV, në deklaratën e tij para ndeshjes.

Mesfushori pranoi se sezonin e kaluar nuk kishte mundur të përsëriste ndikimin e madh që pati në vitin e parë te Reali, kryesisht për shkak të problemeve fizike. Megjithatë, pas rikuperimit dhe ndeshjeve të fundit ndaj Getafes dhe Juventusit, ai thotë se ndihet më i fortë se kurrë.

“Ndihem shumë mirë dhe i lumtur. Më në fund jam kthyer në fushë. Në ndeshjet e fundit para pauzës dhe pastaj ndaj Getafes e Juventusit, fillova të ndihesha më mirë, më afër nivelit tim. Jam i fortë dhe pozitiv, ndoshta në gjendjen më të mirë fizike që kam qenë prej kohësh. Jam gati të jap gjithçka për ekipin që të vazhdojmë momentin e mirë që kemi ndërtuar,”
– shtoi ai.

Real Madridi hyn në El Clásico si favorit i lehtë, ndërsa Barcelona përballet me mungesa të shumta për shkak dëmtimesh. Bellingham, i cili ka qenë shpesh vendimtar në përballjet e mëdha, synon të jetë sërish protagonisti kryesor në një nga ndeshjet më të mëdha të sezonit.